Osmani fton liderët e partive për bllokadën politike në Kosovë, takohet me Kurtin

Presidentja e Kosovës, Vjosa Osmani, do të ndërmarrë përpjekje të reja për të zhbllokuar ngërçin politik që ka mbërthyer vendin pas dështimeve për konstituimin e Kuvendit.

Në një hap të ri, Osmani ka ftuar liderët e partive politike në takime të veçanta, me qëllim gjetjen e një rrugëdaljeje nga bllokada që vazhdon prej muajsh. Osmani e ka nisur këtë të mërkurë takimin në orën 10:00 me Albin Kurtin, më pas me liderët e partive të tjera parlamentare në përpjekjen e dytë të saj për zgjidhje të ngërçit të krijuar në Kuvend.

Të gjithë liderët politikë i janë përgjigjur pozitivisht kësaj ftese. Ndryshe nga përpjekja e parë, këtë herë takimet zhvillohen “veç e veç” për secilin lider.

Në takimin paraprak, përfaqësuesit e PDK-së, LDK-së dhe AAK-së dolën me kritika ndaj Kurtit dhe Vetëvendosjes, duke e cilësuar atë si një “farsë” dhe duke dyshuar për mungesë të vullnetit real për kompromis.

Presidentja Osmani pritet të vazhdojë takimet gjatë ditës së enjte me liderët e komuniteteve pakicë në përpjekje për tejkalimin e krizës politike.

LEXONI GJITHASHTU:

• Durrës: Katër persona marrin me forcë dhe dhunojnë 48-vjeçarin, në kërkim autorët
• Këmbimi valutor: Euro në nivele të ulëta, me sa shiten e blihen monedhat e tjera