LVV në Shqipëri akuzon numëruesit për ‘grabitje’ të votave të tyre

Lëvizja Vetëvendosje në Shqipëri ka vijuar me publikimin e vëzhgimeve të bëra nga kandidatët e pavarur në qarkun e Tiranës, Lezhës dhe Gjirokastrës, përkatësisht Boiken Abazi, Iliaz Shehu dhe Kreshnik Merxhani gjatë numërimit të votave në zgjedhjet e 25 prillit, duke ilustruar me foto mënyrën se si sipas tyre u abuzua me votat e LVV.

Sipas LVV, vëzhguesit e saj kanë identifikuar në masë këtë mënyrë “numërimi” votash, ku katrori i subjektit zgjedhor me nr. 13 mbulohej gjatë gjithë kohës sa shfaqej fleta e votimit në ekranin e tavolinave të numërimit.

“Kjo metodë ‘numërimi’ është në shkelje flagrante të Kodit Zgjedhor dhe Udhëzimeve të KQZ-së. Duke mbuluar katrorin e subjektit zgjedhor me numër 13, nuk lejohet të kuptohet nëse në atë katror ka pasur ose jo një ‘X’. Si fenomen i përhapur në masë, le të kuptohet se ka qenë pjesë e një plani të manipulimit të vullnetit të qytetarëve për të nxjerrë jashtë loje kandidatët e pavarur”, thuhet në një reagim të LVV në rrjetet sociale.

Më herët Lëvizja Vetëvendosje ka hedhur akuza për shkelje ligjore të bëra nga komisionet e qendrave të numërimit gjatë procesit të numërimit të votave. Këto shkelje përfshijnë moslejimin e vëzhguesve të pavarur për të hyrë në qendrat e numërimit, presion për të mos dokumentuar krimet elektorale gjatë procesit të numërimit, injorimin e kërkesave të tre kandidatëve nga komisionet të numërimit të votave, etj.