Conference League, Dinamo, Egnatia, Ballkani dhe Prishtina kërkojnë kualifikimin

Mbrëmjen e kësaj të mërkure, disa skuadra shqiptare zbresin në fushë në kuadër të ndeshjeve kualifikuese të UEFA Conference League.

Pas fitores në transfertë ndaj skuadrës nga Andorra, Athletic Escaldes, Dinamo synon të sigurojë kalimin në raundin e tretë të kompeticionit.

Ndeshja e kthimit do të luhet në “Elbasan Arena”, në orën 20:45.

Egnatia, që javën e kaluar fitoi 2-0 në fushën e Dinamo Minsk, kërkon të ruajë avantazhin dhe të sigurojë një tjetër kualifikim historik.

Ndeshja luhet në stadiumin e Rrogozhinës, në orën 21:00.

Në fushë do të zbresin gjithashtu edhe Prishtina dhe Ballkani.

Skuadra nga kryeqyteti i Kosovës do të përballet në orën 20:00 me ekipin Larne nga Irlanda e Veriut.

Ndeshja e parë mes tyre përfundoi 0-0, dhe gjithçka mbetet e hapur për këtë takim vendimtar.

Ballkani, ndërkohë, do të luajë në transfertë ndaj Floriana-s së Maltës në orën 20:45.

Skuadra nga Suhareka vjen me një avantazh të rëndësishëm pas fitores 4-2 në ndeshjen e parë.

Lajmi pozitiv për futbollin shqiptar është se asnjë prej skuadrave nuk ka pësuar humbje në ndeshjet e para, duke mbajtur gjallë shpresat për një kualifikim të trefishtë ose më shumë në raundin tjetër të Conference League.

LEXONI GJITHASHTU:

• Historike, Shkëndija mund Steauan në Rumani dhe shkon në turin e tretë të Champions
• Vllaznia përmbys Daugavpils dhe kualifikohet në Conference League, shkëlqen Dodaj