Humbja dramatike me Vikingur Reykjavik në Islandë, Vllaznia eliminohet nga Europa

Vllaznia e Shkodrës i ka dhënë fund aventurës së saj në Ligën e Konferencës, duke u eliminuar në turin e dytë kualifikues pas humbjes 4-2 në ndeshjen e kthimit ndaj Vikingur Reykjavik, pas kohës shtesë.

Pas fitores 2-1 në ndeshjen e parë në Shkodër, skuadra shqiptare nuk arriti të ruajë epërsinë në Islandë, ku u përball me një rival të vendosur dhe efikas.

Ndeshja nisi me gol të shpejtë për vendasit, kur Hafsteinsson kaloi Vikingur në avantazh në minutën e 10’. Bekim Balaj barazoi nga penalltia në minutën e 26’, duke mbajtur shpresat e Vllaznisë gjallë. Pjesa e parë përfundoi 1-1, ndërsa në pjesën e dytë Hansen kaloi përsëri në epërsi vendasit në minutën e 55’.

Balaj ishte sërish i saktë nga pika e bardhë në minutën e 85’, duke barazuar rezultatin dhe duke i rikthyer shpresat shkodranëve por vetëm një minutë më vonë, Hansen shënoi për herë të dytë, duke çuar ndeshjen në kohën shtesë me rezultatin e përgjithshëm 3-3.

Në minutën e 94’, Thorkelsson shënoi golin vendimtar që i dha fitoren 4-2 dhe kualifikimin Vikingur Reykjavik pas më shumë se 120 minutash lojë.

LEXONI GJITHASHTU:

• Berisha eliminon Anderlehtin e Hasit, Hacken në raundin e tretë të Europa League