Kryeministri Rama: Mirënjohje për zjarrfikësit, dënimin më të rëndë ndaj autorëve

Kryeministri Edi Rama ka reaguar në lidhje me situatën e zjarreve që po përfshijnë disa zona të vendit, duke shprehur falenderimet dhe mirënjohjen për të gjithë ata që po punojnë pa u lodhur për të përballuar flakët dhe për të mbrojtur jetën e qytetarëve.

Në një postim në rrjetet sociale, Rama ka theksuar: “Falenderim, respekt, mirënjohje me zemër për zjarrfikësit, forcat e ushtrisë, policinë, vullnetarët dhe banorët që po përballen me flakët, duke rrezikuar jetën për të mbrojtur njerëzit, shtëpitë dhe natyrën tonë.”

Ai gjithashtu ka theksuar se ata që ndezin zjarre qëllimisht janë duke shkatërruar pasuri dhe rrezikuar jetët e qytetarëve.

“Ata që ndezin zjarre qëllimisht, shkatërrojnë pasurinë dhe rrezikojnë jetë, në këtë kohë të vështirë ngrohjeje globale dhe flakësh që po sfidojnë të gjitha shtetet e Mesdheut sidomos, duhet të marrin dënimin më të rëndë që parashikon ligji”, shkruan kryeministri Edi Rama.

LEXONI GJITHASHTU:

• Situata e zjarreve, prefekti i Vlorës: Erë e fortë, vështirësi në shuarjen e flakëve
• Situata nga zjarret, Çako: Mbi 10 mijë forca të emergjencave civile në terren