Liverpool e nis sezonin me fitore, likuidon Bournemouth 4-2

Kampionët në fuqi të Anglisë e nisën gjithçka aty ku e lanë sezonin e shkuar, me një fitore ndaj Bournemouth në një ndeshje tejet emocionuese në “Anfield”. Të besuarit e Arne Slot dhuruan një tjetër 90’ spektakolar, ndërsa heroi ishte sulmuesi francez Hugo Ekitike.

Kampionët e nisën mjaft mirë ndeshjen, ku pas dominimit në minutat e para gjetën dhe golin me Ekitike, pas një lëvizje të bukur të francezit në zonë.

Në pjesën e dytë u dyfishua rezultati me të përhershmin Gakpo, por Bournemouth arriti të reagojë shumë shpejt, duke rikthyer ekuilibrat pas dopietës së Semenyo. 2 minuta nga fundi i takimit nuk mungoi as goli i italianit Chiesa që dërgoi shifrat në 3-2, ndërsa triumfi u vulos nga mbreti egjiptian Momo Salah.

4-2 dhe Liverpool e nis me këmbën e mbarë sezonin e ri të Premier League, duke bindur në lojë e rezultat, por ky sezon në Angli pritet të jetë edhe më i vështirë, sidomos për të kuqtë që duan të mbrojnë titullin kampion, kjo pasi edhe skuadrat e tjera kanë shpenzuar shumë në merkaton verore.

LEXONI GJITHASHTU:

• Kampionati anglez nis të premten, Liverpool sfidohet nga Bournemouth
• Isak i vendosur për të mos u kthyer te Newcastle, Liverpool qëndron në pritje