Aksident i rëndë në RMV, ndërrojnë jetë dy adoleshentet shqiptare

Një aksident i rëndë ka ndodhur të premten në qytetin e Kërçovës në Maqedoninë e Veriut.

Dy nxënëse 16-vjeçare me origjinë shqiptare, Eriona Ramadani dhe Albina Abazi, nga Shkolla e Mesme e Muzikës “Drita”, humbën jetën në një aksident me motoçikletë pranë fshatit Kolibar.

Përmes një reagimi në rrjete sociale shkolla shkruan se humbja e dy nxënëseve ka tronditur thellë komunitetin shkollor. Drejtori, stafi mësimdhënës dhe nxënësit u shprehën ngushëllimet më të sinqerta familjeve, duke u lutur që të gjejnë forcë për të përballuar këtë humbje të madhe.

Në një postim zyrtar, shkolla shkroi:

“Me dhembje të thellë dhe zemra të tronditura morëm lajmin për ndarjen tragjike nga jeta të dy nxënëseve tona të dashura, Eriona Ramadani dhe Albina Abazi. Humbja e tyre ka prekur thellë çdo kënd në shkollën tonë dhe ka lënë pas një boshllëk të pazëvendësueshëm. Në këto çaste të rënda, stafi pedagogjik, drejtoria dhe gjithë nxënësit e SHMK ‘Drita’ shprehim ngushëllimet më të sinqerta për familjet, të afërmit dhe miqtë e tyre. Qoftë kujtimi i Erionës dhe Albinës i përjetshëm! U prehshin në paqe!”

Ngjarja ka shkaktuar pikëllim të madh në komunitetin e Kërçovës, ndërsa autoritetet lokale po vijojnë hetimet për rrethanat e aksidentit.

LEXONI GJITHASHTU:

• Aksidenti në Greqi ku vdiqën 3 shqiptarë, flet dëshmimtari: Po digjeshin të gjallë
• Aksident në Gjermani/ Autobusi nga Kosova përplaset me kamionin, 30 të plagosur