Trump: Putin dhe Zelensky kanë urrejtje të paimagjinueshme për njëri-tjetrin

Presidenti amerikan Donald Trump këtë të hënë komentoi për marrëdhëniet e tensionuara mes presidentit rus Vladimir Putin dhe homologut të tij ukrainas, Volodymyr Zelensky, duke e përshkruar urrejtjen mes tyre si “të papërshkrueshme” dhe duke theksuar se ata pothuajse nuk komunikojnë fare.

Gjatë një konference për media në Shtëpinë e Bardhë, Trump foli për mundësinë e organizimit të një takimi apo samiti mes dy udhëheqësve të vendeve të përfshira në konflikt, duke thënë:

“Nëse dëshironi ta quani samit apo thjesht takim, nuk ka rëndësi, por ndoshta do të jetë e nevojshme t’i bindim, pasi ata e urrejnë njëri-tjetrin aq shumë sa që komunikimi mes tyre është shumë i vështirë.”

Ai nënvizoi se mungesa e bisedimeve direkte midis Putin dhe Zelensky është një nga barrierat kryesore për arritjen e paqes në rajon.

“Ata nuk janë në gjendje të kenë një dialog të drejtpërdrejtë,” tha Trump, duke lënë të kuptohet se mund të ndërmjetësojë për të ndihmuar në tejkalimin e këtij bllokimi diplomatik.

Fjalët e tij vijnë në një periudhë kur përpjekjet për të arritur një zgjidhje diplomatike në konfliktin Rusi-Ukrainë nuk kanë dhënë rezultate, ndërkohë që përleshjet në pjesën lindore të Ukrainës vazhdojnë me intensitet.

LEXONI GJITHASHTU:

• Trump intensifikon retorikën kundër të majtës radikale pas vrasjes së Charlie Kirk
• Trump letër vendeve të NATO-s: Gati për sanksione të mëdha ndaj Rusisë