Seria A: Modriç “heroi” i Milanit, Napoli e Juventus me pikë të plota

Në moshën 40-vjeçare, Modriç ishte protagonist për Milanin në ndeshjen me Bolonjën, duke shënuar golin e vetëm të takimit që i dha 3 pikët kuqezinjve. Të vetmet skuadra që i kanë fituar 3 ndeshjet e para në Serinë A deri më tani janë Napoli dhe Juventus.

Një gol i Luka Modriç në pjesën e dytë i ka mjaftuar Milanit për të regjistruar fitoren e dytë në kampionatin italian, aty ku deri më tani janë luajtur 3 javët e para. Kuqezinjtë dominuan takimin dhe shpërdoruan raste të pastra shënimi kryesisht me sulmuesin Gimenez. Ky i fundit dështoi në të gjitha ballafaqimet me portierin kundërshtar, duke e vendosur në pozita të vështira skuadrën, që edhe mund të pësonte. Goli i fitores erdhi nga Luka Modriç, mesfushori 40-vjeçar i cili në minutën e 61’ mori një pasim nga Saelemaekers dhe goditi në hyrje të zonës, duke kaluar përpara Milanin, aq sa mjaftoi për të marrë 3 pikët.

Në 3 javët e para të Serisë A, të vetmet skuadra që ia kanë dalë t’i fitojnë përballjet janë Napoli dhe Juventus, secila me nga 9 pikë. Bardhezinjtë mposhtën në fundjavë Interin në një prej dueleve më dramatike të viteve të fundit, ku u shënuan plot 7 gola.

Sa i përket kampionëve në fuqi, nuk hasën vështirësi ndaj Fiorentinës, të cilën e mposhtën 3-1. Të besuarit e Antonio Contes shfrytëzuan mirë mundësitë e krijuara, duke mos lënë hapësirë për skuadrën nga Firence.

LEXONI GJITHASHTU:

• Një tjetër ndryshim në listën e Shqipërisë, largohet portieri i kuqezinjve
• Ndryshon lista e kombëtares: Mbrojtësi shqiptar braktis kuqezinjtë, zgjedh Zvicrën