“Mbrohuni ose do vdisni”| Starmer dënon deklaratat e Elon Musk: Po nxit dhunë

Qeveria britanike ka reaguar ashpër ndaj deklaratave të Elon Musk gjatë protestës masive të së djathtës në qendër të Londrës kundër emigracionit ilegal. Demonstrata e fundjavës mblodhi mbi 110 mijë pjesëmarrës dhe u shoqërua me fjalimin e Musk përmes video-konference.

Në mesazhin e tij, themeluesi i Tesla dhe SpaceX tha se opinioni publik në Britani “ka frikë të ushtrojë lirinë e mendimit”, ndërsa akuzoi BBC-në si “bashkëfajtore në shkatërrimin e Britanisë”.

Ai iu referua emigracionit dhe Brexit-it, duke i paralajmëruar protestuesit: “Nëse ju zgjidhni dhunën ose jo, dhuna vjen te ju. Ose mbrohuni, ose do të vdisni.”

Musk shkoi edhe më tej, duke kërkuar shpërbërjen e Parlamentit dhe zëvendësimin e qeverisë laburiste të Keir Starmer.

Kryeministri britanik e cilësoi këtë gjuhë si të rrezikshme, por refuzoi vendosjen e sanksioneve ndaj Musk.

“Britania e Madhe është një komb që krenohet për tolerancën, diversitetin dhe respektin. Protesta paqësore është një bërthamë e vlerave të vendit tonë,” shkroi Starmer në platformën X. Ndërkohë, një zëdhënës i tij tha se britanikët nuk dëshirojnë “gjuhë të rrezikshme dhe nxitëse” dhe se me deklarime të tilla “provokohet dhunë dhe intimidim në rrugët tona”.

Kryetari i liberal-demokratëve, Ed Davey, e akuzoi Musk për ndërhyrje në demokracinë britanike dhe për nxitje të dhunës. Ai i kërkoi qeverisë që të ndërpresë çdo porosi shtetërore me kompaninë Tesla. Edhe politikanë të tjerë e dënuan ashpër fjalimin, duke e lidhur atë me marrëdhëniet e Musk me ekstremistin britanik të djathtë Tommy Robinson, i cili u përmend sërish gjatë videokonferencës.

LEXONI GJITHASHTU:

• Britania drejt bllokimit të vizave për vendet që s’pranojnë emigrantët e paligjshëm
• Britania vendos sanksione të reja ndaj Rusisë për dëbimin e fëmijëve ukrainas
• Britania zgjeron sanksionet ndaj Rusisë, në listë edhe zyrtarë të lartë