Mbledhja e Këshilli Bashkiak/ Fino: Po marrim një vendim të imponuar për Tiranën

Ka nisur mbledhja e Këshillit Bashkiak të Tiranës, ku në qendër të diskutimeve është kërkesa për shkarkimin e kryetarit të bashkisë, Erion Veliaj. Mbledhja u hap nga kryetarja e Këshillit, Megi Fino, e cila theksoi se vendimi që pritet të merret sot vjen si pasojë e një nevoje të menjëhershme për drejtim në krye të bashkisë.

“Dua të nënvizoj me forcë që ky hap po imponohet nga nevoja urgjente për të ecur… Sot ne po kryejmë detyrimin politik dhe moral për të zgjidhur ngërçin politik të Tiranës,” u shpreh Fino në fjalën e saj hapëse.

Ajo vlerësoi gjithashtu mandatin e Veliajt, duke e cilësuar atë si transformues për kryeqytetin.

“…kujtojmë të gjithë se ishte tetori në 2015 kur Erion Veliaj nisi transformimin e Tiranës pas agonisë së kryebashkiut të mëparshëm. Ishit dëshmitarë të transformimit. Nuk është rastësore që qytetarët i kanë rinovuar besimin tre herë,” tha ajo.

Në rendin e ditës ndodhet vetëm një pikë: projektvendimi për shkarkimin e kryebashkiakut të Tiranës, Erion Veliaj.