“Kam shembur legenin”- Flet sopranoja që rrëzua në skenë: Neglizhencë e tenorit

Sopranoja e njohur Eva Golemi e cila u rrëzua në skenën e Teatrit Kombëtar të Operas dhe Baletit ka shembur legenin dhe aktualisht ndodhet në shtrat.

Në një reagim për gazetaren e Euronews Albania, Anila Kolgjini, ajo thotë se mjekët i kanë sugjeruar 10 ditë pushim për t’u rikuperuar plotësisht.

Golemi thotë se rënia e saj erdhi për shkak të neglizhencës së tenorit meksikan Mario Rojas, i cili nuk e priti në momentin që ra, ndërsa shton se nga ky i fundit nuk ka pasur asnjë reagim.

“Jam në shtrat. Kam shembur legenin dhe mjekët më kanë këshilluar 10 ditë pushim. Do bëj sërish vizita e më pas do shoh gjendjen. Ishte neglizhencë e tenorit, pasi nuk më priti në momentin që po bija. Nuk më ka ndodhur kurrë më parë. Dhe në pamje duket qartë se i kujt ishte gabimi. Nuk ka pasur asnjë reagim nga ana e tij”, tha ajo.

Incidenti i pazakontë ndodhi mbrëmjen e 26 shtatorit, në premierën e “La Traviatës” në Teatrin Kombëtar të Operas dhe Baletit. Eva Golemi në rolin e Violetës duhet të binte në krahët e Alfredos, rol që luhej nga tenori Mario Rojas, por ky i fundit nuk e realizoi siç duhet rolin e tij. Rojas ndodhej larg Golemit, duke e lënë sopranon të rrëzohet në tokë.

Në katër netët e shfaqjes, me tre kaste të ndryshme, në operën me produksion të mjeshtrit me famë botërore Hugo de Ana ishte planifikuar që Golemi të ishte në rolin e Violetës, por pas incidentit roli i Golemit u anulua.

Eva Golemi ka interpretuar qindra role, por Violetta e “La Traviatta-s” ishte ndër rolet e preferuara të saj, të cilin e ka sjellë mbi 70 herë në skenë.

LEXONI GJITHASHTU:

• VIDEO/ Momenti kur sopranoja Eva Golemi rrëzohet në skenë, tenori nuk reagoi në kohë
• Ndahet nga jeta sopranoja e njohur Luiza Papa (Çako), nëna e Piro Çakos