Mediat ndërkombëtare jehonë fitores historike të Shqipërisë në Serbi

Fitorja historike e Kombëtares në Serbi, e vlefshme për Grupin K kualifikues të Kupës së Botës 2026, ka tërhequr edhe vëmendjen e medias ndërkombëtare.

Mediat evropiane përshkruan atmosferën dhe pasojat e kësaj ndeshjeje, që shënoi një kthesë të rëndësishme në garën për Kupën e Botës.

Në fokus ishin jo vetëm rezultati dhe performanca e lojtarëve, por edhe pasojat për trajnerin serb dhe tensionet historike mes dy vendeve, që ndikuan në zhvillimin e takimit.

Euronews Serbia

“Serbia u mund nga Shqipëria (0:1) në Leskovac, në një ndeshje që la një shije të hidhur për tifozët vendas. Pavarësisht disa rasteve të mundshme, “shqiponjat” nuk arritën të gjenin rrugën drejt portës, ndërsa mysafirët shfrytëzuan shansin e vetëm të vërtetë në pjesën e parë me anë të Manajt.

Me këtë humbje, Serbia i uli në minimum shanset për të qenë në vendin e dytë, d.m.th. i mbetet vetëm të shpresojë që Shqipëria të bjerë diku poshtë deri në fund të kualifikimeve”.

ANSA

“Në Shqipëri shpërthyen festime pas fitores 1-0 të ekipit të tyre kombëtar të futbollit ndaj Serbisë në ndeshjen për kualifikueset për Kupën e Botës, dje në mbrëmje.

Mijëra tifozë mbushën sheshet në të gjithë vendin, duke valëvitur flamurin kombëtar, duke kënduar dhe kërcyer, mes tingujve të borive të makinave që ishin mbledhur për këtë rast.

Për shqiptarët, fitorja e së shtunës ka një rëndësi të dyfishtë ku përveç faktit se ekipi i tyre pothuajse ka siguruar vendin e dytë në Grupin K, dhe kështu një shans për t’u kualifikuar për fazën eliminatore të Kupës së Botës, ata po e shijojnë veçanërisht hakmarrjen kundër ekipit kombëtar të një vendi me të cilin kanë ndarë një histori të gjatë dhe të mbushur me konflikte”.

BBC

“Dragan Stojkoviç dha dorëheqjen nga posti i trajnerit të Serbisë menjëherë pas humbjes 1-0 të skuadrës së tij kundër Shqipërisë në kualifikueset e Kupës së Botës të shtunën.

Rey Manaj shënoi golin e vetëm për t’i çuar serbët në dy humbje radhazi, pas disfatës shkatërruese 5-0 muajin e kaluar nga Anglia.

Kjo i lë ata të tretët në Grupin K, me Anglinë në krye me 15 pikë dhe Shqipërinë të dytën me 11, pasi kanë luajtur një ndeshje më shumë.

Ndeshja e së shtunës u zhvendos nga kryeqyteti i Serbisë në qytetin jugor të Leskovacit për shkak të frikës për sigurinë, pasi të dy vendet kanë një histori të gjatë tensionesh politike”.

AFP

“Trajneri i ekipit kombëtar serb të futbollit, Dragan Stojkoviç, njoftoi dorëheqjen e tij dje në mbrëmje pas një humbjeje 0-1 në shtëpi ndaj Shqipërisë në kualifikueset për Kupën e Botës 2026.

“Kjo humbje nuk duhej të kishte ndodhur dhe unë pranoj përgjegjësinë për të. Jam këtu për t’u përballur me pasojat”, tha Stojkoviç në një konferencë për shtyp pas ndeshjes, e cila u zhvillua në qytetin jugor të Leskovacit.

”Rezultati ishte shumë i keq, nuk e prisja”, u ankua ai.

Ai shtoi se ia kishte paraqitur dorëheqjen presidentit dhe sekretarit të përgjithshëm të Federatës Serbe të Futbollit.

“Nuk do të shkoj në Andorra për të udhëhequr ekipin në ndeshjen e ardhshme kualifikuese”, tha ai.

I njohur si Piksi kur luante për Jugosllavinë, Stojkoviç, një ish-mesfushor 60-vjeçar, ka qenë në krye të ekipit kombëtar serb që nga viti 2021 ndërsa gjatë karrierës së tij, ai gjithashtu drejtoi edhe “Crvena Zvezda”-n e Beogradit”.

TANJUG

Kombëtarja e futbollit të Serbisë u mposht nga Shqipëria në Leskovac me rezultatin 0-1, në ndeshjen e Grupit K të kualifikimeve për Kupën e Botës 2026. Tifozët e pakënaqur i kërkuan vazhdimisht trajnerit serb Dragan Stojkoviç në fund të ndeshjes që të largohej.
Shqiptarët mund të kishin arritur një triumf më bindës, por Nedim Bajrami humbi një rast në një situatë vetëm për vetëm me portierin Petroviç.

VIJESTI

“Shqipëria mposhti Serbinë në Leskovac në Grupin K, i cili udhëhiqet bindshëm nga Anglia.
Përpara vetëm katër mijë spektatorëve në stadiumin “Duboçica”, goli i Rey Manajt në minutën e parë të kohës shtesë në pjesën e parë vendosi ndeshjen.

Shqipëria ka një avantazh prej katër pikësh ndaj Serbisë në garën për vendin e dytë, por me një ndeshje më shumë.

Një fitore e merituar për Shqipërinë, megjithëse Serbia ishte më e rrezikshme në gjysmën e parë të ndeshjes. Pasi morën epërsinë, shqiptarët morën kontrollin dhe e ruajtën epërsinë e tyre pa probleme të mëdha.

Në Leskovac pati vetëm tensione sporadike. Himni shqiptar u fishkëllye para fillimit të ndeshjes”.

B92

Një humbje e dhimbshme”, e konsideron media e njohur serbe B92 mposhtjen e Serbisë nga Shqipëria.

LEXONI GJITHASHTU:

• Media greke: Shqiptarët festuan njësoj si në vitin 2004 kur mundën Greqinë
• Federata Serbe pranon dorëheqjen e Stojkoviçit, emërohet zëvendësuesi i përkohshëm
• I mundëm në shtëpinë e tyre! Sylvinho: Jam krenar për lojtarët e mi