Kryesore | Lajmi i fundit

OSBE-ODIHR publikon raportin final për zgjedhjet e 11 majit

23 Tetor 2025 | 11:32

Misioni i Organizatës për Siguri dhe Bashkëpunim në Evropë – Zyrës për Institucionet Demokratike dhe të Drejtat e Njeriut (OSBE-ODIHR) ka publikuar raportin e tij përfundimtar lidhur me vëzhgimin e zgjedhjeve parlamentare të mbajtura më 11 maj në Shqipëri.

Raporti i ODIHR evidenton rastet e presionit mbi votues dhe përdorimin e administratës publike për fushatë elektorale ndërsa thuhet se zgjedhjet u zhvilluan nën një klimë të polarizuar partiake ku disa prej kandidatevë nuk patën terren te barabartë.

Sipas raportit, procesi i numërimit të votave, i cili u ndoq nga vëzhgues ndërkombëtarë në shumicën e qendrave të numërimit, u karakterizua nga disa probleme dhe sfida që ndikuan në rrjedhën e procesit.

Në raport evidentohen tensione, vonesa dhe ndërhyrje nga vëzhgues partiakë në disa qendra, si dhe mungesa e aksesit të plotë në disa raste.

Gjithashtu, raportohet për praktika të dobëta në trajnimet e numëruesve dhe vonesa në shpërndarjen e protokolleve, duke ngadalësuar dhe komplikuar procesin e përfundimit të rezultateve.

Megjithatë, OSBE-ODHIR vlerëson se numërimi u zhvillua përgjithësisht në mënyrë të rregullt, duke theksuar nevojën për përmirësime në organizimin dhe transparencën e zgjedhjeve në të ardhmen.

Në raport theksohet nevoja urgjente për një Reformë Zgjedhore gjithëpërfshirëse, që duhet të bëhet përmes një procesi konsultativ dhe transparencë, në përputhje me standardet ndërkombëtare.

Një tjetër rekomandim kryesor është depolitizimi i administratës zgjedhore, sidomos në nivelet më të ulëta, për të siguruar stabilitet dhe profesionalizëm gjatë procesit.

Raporti kërkon gjithashtu përmirësimin e trajnimeve për ekipet e numërimit të votave, me standardizim të procedurave dhe përgatitje adekuate për të gjithë anëtarët, edukimin e votuesve mbi përdorimin e votimit elektronik duhet të intensifikohet për të rritur ndërgjegjësimin dhe pavarësinë e votuesve gjatë procesit dhe ndalimin e përdorimit të burimeve shtetërore për qëllime elektorale.

Gjithashtu, OSBE-ODHIR rekomandon që aktivitetet parazgjedhore të përcaktohen qartë si pjesë e fushatës dhe të nënshtrohen raportimit dhe kontrolleve të rrepta, ndërsa pamjet e partive dhe zyrtarëve të qeverisë duhet të etiketohen si reklama politike dhe të ndalohen në programet editoriale.

Këto masa synojnë të garantojnë një proces zgjedhor të drejtë, transparent dhe të barabartë për të gjithë aktorët politikë.

Pjesë nga raporti

NUMËRIMI DHE REZULTATET
Vëzhguesit ndërkombëtarë (IEOM) ndoqën procesin e numërimit në 66 nga 93 qendrat e numërimit. Procesi u vlerësua negativisht në 8 raste, kryesisht për shkak të:
•tensioneve gjatë numërimit (9 raste),
•mbipopullimit në qendra (7 raste),
•mungesës së aksesit të plotë (12 raste),
•dhe ndërhyrjeve nga vëzhgues partiakë (6 raste).
12 kuti votimi u identifikuan nga KQZ si të parregullta dhe u përjashtuan nga numërimi deri në inspektimin përfundimtar. Mangësitë më të shpeshta lidhen me mosnumërimin e fletëve të papërdorura në fillim, si dhe me mosshfaqjen e fletëve para kamerave, siç kërkohet nga rregullat.
Në përgjithësi, numërimi u zhvillua në mënyrë të rregullt, megjithëse në shumë qendra u vërejt kaos dhe kontestime për disa fletë. Kishte vonesa për shkak të vonesës së mbërritjes së numëruesve, trajnimeve të improvizuara në momentet e fundit dhe ndryshimeve të vonshme të anëtarëve të grupeve të numërimit.
Në Dibër dhe Elbasan, vëzhguesit raportuan se trajnimet për numëruesit u zhvilluan në mesnatë, për shkak të ndërrimeve të fundit të anëtarëve të emëruar nga partitë. Sipas KQZ-së, në 30% të grupeve të mëdha të numërimit, partitë politike vazhdonin të zëvendësonin anëtarët deri në shpalljen e rezultateve, duke ndikuar në shpejtësinë e procesit.
Në 19 raste, kopjet e protokolleve të rezultateve nuk iu dhanë vëzhguesve partiakë, duke kufizuar transparencën.
Në disa qendra u vunë re mospërputhje midis protokolleve me shkrim dore dhe atyre digjitale, si dhe vonesa në shpërndarjen e kopjeve për partitë. Në një rast në Tiranë, numërimi u pezullua për disa orë pas një përleshjeje mes një vëzhguesi të PS-së dhe sekretarit të qendrës.
Deri më 16 maj, KQZ kishte numëruar 75% të fletëve (147,024), ndërsa 52,368 fletë nga Greqia u mbajtën mënjanë për verifikim. PD kërkoi ndarjen e këtyre votave, duke pretenduar parregullsi në dorëzimin e tyre. Pas disa vendimeve dhe apelimeve, më 16 maj, KQZ vendosi që votat nga Greqia të përfshihen në numërim. Numërimi përfundoi më 21 maj. Nga 202,187 vota të ardhura nga jashtë, 1,973 (1%) u shpallën të pavlefshme.
Asnjë nga komisionet zonale nuk arriti të përmbyllte numërimin brenda 48 orëve ligjore. Në total, u hodhën 1,665,501 vota, prej të cilave 96.5% ishin të vlefshme dhe 3.5% të pavlefshme.
Pas zgjedhjeve, situata mbeti e qetë. Kryeministri Edi Rama shpalli fitoren më 14 maj, ndërsa PD organizoi protestë më 16 maj, duke e cilësuar procesin të manipuluar dhe kërkoi pezullim të certifikimit të rezultateve deri në një auditim të pavarur të votimit nga jashtë.
Disa parti të vogla kritikuan sistemin elektoral, duke thënë se ai nuk pasqyron në mënyrë të drejtë votat në mandate.
Më 26 maj, KQZ përfundoi numërimin në të 12 qarqet, dhe pas ankesave nga disa subjekte, Komisioni i Apelimit urdhëroi rinumërime të pjesshme në Tiranë, Durrës, Dibër dhe Fier.
Në Tiranë u bë rinumërim i plotë, ku u zbuluan disa mospërputhje, por jo aq sa të ndryshonin mandatet. Në Fier, rinumërimi solli një ndryshim brenda listës së PS, ku Maldrita Bardho fitoi fillimisht mandatin me 10 vota diferencë, por më pas u tërhoq, duke ia rikthyer mandatin Zegjine Çaushit.
Më 28 gusht 2025, Komisioni Rregullator certifikoi përfundimisht rezultatet e zgjedhjeve të 11 majit, me 3 vota pro dhe 2 kundër.
LEXONI GJITHASHTU:
Home Kryefaqja
Shiko në: YouTube
Lajme të Sugjeruara
“Jam i lodhur nga telenovela Veliaj”, Hasimja: Sa më e gjatë bëhet, aq më shumë lodhen njerëzit
“Jam i lodhur nga telenovela Veliaj”, Hasimja: Sa më e gjatë bëhet, aq më shumë lodhen njerëzit
Euronews Albania | Kryesore | Lajm kryesor | Lajmi i fundit | NOW me Erla Mëhillin

“Jam i lodhur nga telenovela Veliaj”, Hasimja: Sa më e gjatë bëhet, aq më shumë lodhen njerëzit

Politologu Ermal Hasimja komentoi në emisionin Now në Euronews Albania vendimin e Gjykatës së Lartë që hodhi poshtë rekursin e kryebashkiakut të Tiranës Erion Veliaj...
21:37 | 28/05/2026
Para, dashuri dhe krim, djali i themeluesit të ‘Mangos’ arrestohet për vrasjen e babait të tij
Para, dashuri dhe krim, djali i themeluesit të ‘Mangos’ arrestohet për vrasjen e babait të tij
Evropa | Kryesore | Lajm kryesor

Para, dashuri dhe krim, djali i themeluesit të ‘Mangos’ arrestohet për vrasjen e babait të tij

Autoritetet spanjolle kanë arrestuar djalin e themeluesit të dyqanit të modës Mango për vrasjen e dyshuar të babait të tij miliarder, i cili vdiq në dhjetor...
10:48 | 19/05/2026
Gazetari Vojka nga SHBA-ja: Irani ka ndaluar negociatorët iranianë që të bëjnë negociata
Gazetari Vojka nga SHBA-ja: Irani ka ndaluar negociatorët iranianë që të bëjnë negociata
Balkan Talks Nga Franko Egro | Bota | Kryesore | Video

Gazetari Vojka nga SHBA-ja: Irani ka ndaluar negociatorët iranianë që të bëjnë negociata

Gazetari, Dorand Vojka në një lidhje live nga SHBA-ja për emisionin “Balkan Talks” me Franko Egro në Euronews Albania ka folur lidhur me luftën në...
21:32 | 24/04/2026