Egnatia synon fitoren ndaj Partizanit, Edison Ndreca: Ndeshje shumë e rëndësishme

Egnatia do të përballet me Partizanin të shtunën në Arenën e Dëmat në Tiranë ndërsa kampionët në fuqi kërkojnë një rezultat pozitiv në kryeqytet, ku synojnë kreun e klasifikimit të Superligës.

Në lidhje me këtë, futbollisti Edison Ndreca foli në një intervistë për Kubin Sportiv në Euronews Albania, duke theksuar rëndësinë e ndeshjes ndërsa tha se vijnë në Tiranë për të marrë tre pikët.

“Ndeshja me Partizanin është shumë e rëndësishme dhe patjetër që ne synojmë tre pikët dhe fitoren e radhës,” tha Ndreca.

Ai shtoi se largimet nga Egnatia kanë qenë me peshë, por gjithsesi të ardhurit po marrin kohën e tyre për t’u konsoliduar me grupin.

Ndreca theksoi se paraqitja e ekipit ka qenë pozitive dhe se Egnatia renditet në vendet e para të tabelës ndërsa si rivalë kryesorë për titull, Ndreca përmendi Vllazninë dhe Dinamon.

Sa i përket formës së tij në këtë sezon, futbollisti tha se e ka kaluar 100% dëmtimin dhe tani po rikthehet në formën më të mirë.

“Dëmtimi i përket të kaluarës dhe shpresoj që të mos kem më”, tha  Ndreca.

Ndreca e mbylli intervistën duke u shprehur: “Ekipi për tu mundur është Egnatia.”

LEXONI GJITHASHTU:

• Egnatia mund Kukësin dhe fiton për herë të parë në histori Superkupën e Shqipërisë!
• Shpallen më të mirët e vitit në futboll/ Bekim Balaj shpallet “Topi i Artë” 2024