Java Kulturore Spanjolle, koncert i kitaristit të njohur Denis Bizhga në Gjirokastër

Programi i aktiviteteve të Javës Kulturore Spanjolle të organizuara në disa qytete të vendit mbylli siparin në Gjirokastër. “Një mbrëmje në kopshtet e Spanjës”,  titullohej koncerti instrumental i kitaristit virtuoz Denis Bizhga që u shfaq në skenën artistike të qytetit të gurtë.

Për instrumentistin e mirënjohur ky event është diçka e veçantë jo vetëm për vlerat artistike por ndërkohë ai rikthehet në vendlindjen e familjes së tij.

“Për mua ishte një kënaqësi e madhe të kthehesha në origjinën e paraardhësve të mi, të luaja një koncert fantastik në qytetin e bukur të Gjirokastrës, në qytetin e traditës dhe më priti një publik shumë i ngrohtë, ishte një sallë e tejmbushur me miq, dashamirës të artit, muzikës”, tha kitaristi.

Artistët i cilësojnë të dobishme aktivitete të tilla që gjallërojnë jetën kulturore në Gjirokastër dhe promovojnë vlerat turistike të saj.

“Sjellja e një mbrëmje të Javës së Kulturës Spanjolle në Shqipëri në qytetin e Gjirokastrës ishte një risi por edhe një domosdoshmëri për ta hapur kulturën spanjolle dhe në qytete të tjera të Shqipërisë duhet thënë që koncerti u mirëprit dhe ky është një ndikim shumë i madh që ka në turizëm dhe kryesisht në turizmin kulturor”, u shpreh Bizhga.

Programi kulturor i sezonit vjeshtë-dimër në Gjirokastër është i pasur me koncerte, ekspozita, shfaqje teatrore etj.

LEXONI GJITHASHTU:

• Java Kulturore Holandeze, vijnë në Tiranë legjendat Arie Haan dhe Ruud Krol
• Nis sot Java e Kulturore Gjermane! Sjell art, muzikë dhe dialog kulturor në Shqipëri