Broja rikthehet pas dëmtimit, aktivizohet në humbjen 0-2 ndaj Chelsea-s

Armando Broja është rikthyer në fushë pas dëmtimit që pësoi me Kombëtaren.

Sulmuesi shqiptar u aktivizua në sfidën e Burnleyt kundër Chelsea-t, e vlefshme për javën e 12-të të Premier League, e cila u zhvillua në “Turf Moor” dhe përfundoi me fitoren 0-2 të londinezëve.

Broja e nisi ndeshjen nga stoli në minutën e 72-të, duke e hedhur në fushë në vend të Flemming. Aktivizimi i tij u prit me duartrokitje nga tifozët vendas, të cilët e motivuan sulmuesin 24-vjeçar në rikthimin e tij pas dëmtimit me Kombëtaren në humbjen 0-2 kundër Anglisë në Tiranë.

Chelsea zhbllokoi takimin në pjesën e parë me golin e Pedro Netos pas një krosimi të saktë të Gittens në minutën e 37-të.

Burnley kërkoi reagimin në pjesën e dytë, por goli i Enzo Fernandez në minutën e 88-të vulosi fitoren e “Bluve të Londrës”, duke i mbyllur shpresat e vendasve për barazim.

Broja pati një paraqitje korrekte gjatë 18 minutave në fushë, megjithëse pa mundur të lërë gjurmë në sulmin e skuadrës.

Në minutat e fundit të ndeshjes, ai pësoi një ndërhyrje të ashpër nga Chalobah dhe mbeti i shtrirë në tokë, duke shkaktuar shqetësim të momentit.

Megjithatë, sulmuesi u ngrit dhe vazhdoi lojën, duke zhdukur frikën për një dëmtim të ri.

Pas kësaj humbjeje, Burnley mbetet në vendin e 17-të me 10 pikë. Chelsea ndërkohë ngjitet në vendin e dytë me 23 pikë, tre më pak se Arsenali kryesues, që ka edhe një ndeshje më pak.