PS kërkon përjashtimin e 29 demokratëve, shtyhet mbledhja e Komisionit të Etikës

Mbledhja e Komisionit të Etikës ku pritet të shqyrtohen kërkesat e Partia Socialiste për përjashtimin e 29 deputetëve të Partisë Demokratike është shtyrë për ditën e martë në orën 10:00.

Kërkesat e PS për përjashtimin nga seancat me 10-60 ditë të deputetëve demokratë lidhen me përplasjet e shënuara një ditë më parë në Kuvend.

PS ka kërkuar që mbledhja të zhvillohet me dyer të mbyllura, ndërsa deputeti i PD, Saimir Korreshi ka kërkuar që mbledhja të jetë e hapur për mediat.

“Do të duhet që mbledhja të jetë e hapur. Po kërkoni të përjashtoni 29 deputetë të opozitës pa të drejtë. Kërkoj që të na vini në dispozicion provat dhe që ato të jenë publike”, tha deputeti  Saimir Korreshi.

“Secili deputet që ka firmosur për pezullimin e mandatit për 60 ditë, 30 ditë apo 10 ditë duhet të tregohen të përgjegjshëm. Të tregohen të përgjegjshëm dhe të paraqesin fakte. Të mos vijnë këtu dhe të akuzojnë me terma të Sigurimit të Shtetit. Na quajnë grupazh, kur në fakt gjykata e ka treguar se grup i strukturuar kriminal është qeveria e Edi Ramës.

Këtu ju keni përfshirë deputetë që nuk kanë bërë asgjë në Kuvend, por keni dashur të fshini opozitën nga Kuvendi, sepse doni një Kuvend njëpartiak. Thojeni këtu: qëllim keni pasur pengesën tonë në Këshillin e Imuniteteve, prandaj edhe ua caktuat mbledhjen në orën 9.

Kështu që propozoj të shtyhet mbledhja për javën tjetër dhe secili deputet të njihet me provat”, u shpreh Gazment Bardhi.

LEXONI GJITHASHTU:

• Përjashtimi i 29 deputetëve të PD, Komisioni i Etikës shqyrton nesër kërkesën e PS
• Kaos në Kuvend, opozita përplaset me Gardën, PS voton ligjet