Projektligji për import-eksportin e armëve të zjarrit, Vengu: Standarde të reja, rritet siguria

Ministri i Mbrojtjes, Pirro Vengu, prezantoi në Kuvend projektligjin për import-eksportin dhe tranzitin e armëve të zjarrit, duke theksuar se bëhet fjalë për një nismë të re ligjore që synon forcimin e kuadrit rregullator të industrisë së mbrojtjes dhe rritjen e kontrollit shtetëror mbi mallrat me përdorim të dyfishtë civil dhe ushtarak.

Gjatë fjalës së tij në seancë plenare, Vengu nënvizoi se projektligji transpozon plotësisht rregulloren e Bashkimit Evropian, pa përjashtime apo kompromise, duke e vendosur Shqipërinë në të njëjtin standard ligjor me vendet anëtare të BE-së në një fushë kyçe për sigurinë publike dhe kombëtare.

“Projektligji për import-eksportin dhe tranzitin e armëve të zjarrit nuk është një nismë e izoluar, por pjesë e një pakete të gjerë ligjore që synon të forcojë kontrollin shtetëror dhe integritetin e të gjithë zinxhirit, nga prodhimi te përdoruesi fundor”, deklaroi ministri i Mbrojtjes.

Sipas Vengut, ligji parashikon mekanizma të rinj që rrisin transparencën dhe sigurinë, përfshirë krijimin e një sistemi elektronik licencimi të sigurt dhe të enkriptuar, si dhe ndërtimin e një baze të dhënash unike ndërinstitucionale. “Synojmë gjurmueshmëri të avancuar për çdo armë zjarri, kontroll përpara dhe pas dërgesës, si dhe masa parandaluese e sanksione për të mbyllur çdo hapësirë abuzimi”, u shpreh ai.

Ministri theksoi gjithashtu se projektligji nuk sjell kosto shtesë për buxhetin e shtetit dhe do të zbatohet brenda kapaciteteve ekzistuese institucionale, duke u mbështetur në eksperiencën 17-vjeçare të Autoritetit Shtetëror të Kontrollit të Eksporteve. “Ky ligj forcon mekanizmin e kontrollit pa krijuar institucione të reja dhe përfaqëson një hap konkret në përmbushjen e piketave të negociatave me Bashkimin Evropian”, tha Vengu.ë përmbyllje, ministri falënderoi komisionet parlamentare për mbështetjen konsensuale të nismës dhe u bëri thirrje deputetëve që ta votojnë projektligjin. “Ju ftoj të gjithë që ta mbështesni këtë nismë, përtej ndasive partiake, në interes të sigurisë dhe integrimit evropian të vendit”, përfundoi ai.