Pas dy vitesh pritje, studentëve të “Shkencave të Rehabilitimit” u njihet diploma

Pas afro dy vitesh pritje dhe paqartësish ligjore, është zgjidhur çështja e njohjes së diplomave për të diplomuarit në “Shkencat e Rehabilitimit”. Me ndryshimin e vendimit të Këshillit të Ministrave, ata tashmë mund të ushtrojnë ligjërisht profesionin e fizioterapistit.

Sipas vendimit të VKM-së, këto diploma njihet zyrtarisht si kualifikim për ushtrimin e profesionit, duke u hapur mundësi për integrim në tregun e punës.

Ministrja Kumbaro nënvizoi se ky ndryshim ligjor do të ketë ndikim pozitiv edhe në regjistrimet e reja në Universitetin e Sporteve. Para këtij vendimi, diploma e Shkencave të Rehabilitimit nuk ishte e përfshirë në listën e specialiteteve për profesionin e fizioterapistit, gjë që pengonte regjistrimin në Urdhrin e Infermierit dhe ushtrimin e profesionit.

Në tre vitet e fundit akademike, në Fakultetin e Shkencave të Rehabilitimit janë diplomuar 72 studentë, ndërsa aktualisht për vitin akademik 2025–2026 po studiojnë 256 studentë.

Rektori i Universitetit të Sporteve, Agron Kasa, vlerësoi angazhimin për zgjidhjen e kësaj problematike, duke theksuar rëndësinë e integrimit të studentëve të diplomuar në tregun e punës dhe njohjes ligjore të profesionit të fizioterapistit.