Gjirokastër, zgjatet orari i vizitave në monumente për shkak të fluksit turistik

Rritja e ndjeshme e numrit të turistëve në Gjirokastër ka sjellë zgjatjen e orarit të vizitueshmërisë së monumenteve të trashëgimisë kulturore në qytet.

Nga muaji maj deri në fund të tetorit, Kalaja e Gjirokastrës dhe Parku Arkeologjik i Antigonesë do të jenë të hapura për vizitorët çdo ditë nga ora 09:00 deri në 19:00, duke ofruar më shumë fleksibilitet për turistët vendas dhe të huaj.

Drejtori i DRTK Gjirokastër, Ardis Duka, tha se ky vendim vjen si përgjigje ndaj rritjes së kërkesës:

“Zgjatja e orarit në sitet me biletari, si Kalaja e Gjirokastrës dhe Antigonea, do të sjellë më shumë komfort për vizitorët dhe pritet të ndikojë pozitivisht në rritjen e numrit të tyre.”

Sipas të dhënave zyrtare, vetëm Kalaja e Gjirokastrës ka pritur rreth 35 mijë vizitorë në katër muajt e parë të vitit, duke shënuar rritje krahasuar me vitin e kaluar. Në total, zona ka kaluar mbi 40 mijë turistë.

Përveç Gjirokastrës dhe Antigonesë, rritje vizitorësh është shënuar edhe në Adrianopojë, Kalanë e Libohovës, Kishën e Labovës së Kryqit, si dhe në disa monumente në Përmet dhe Tepelenë.