Protesta masive në Novi Sad, mijëra qytetarë kërkojnë zgjedhje të parakohshme në Serbi

Mijëra qytetarë marshuan në Novi Sad për të përkujtuar 16 viktimat e tragjedisë në stacionin hekurudhor dhe për të kërkuar mbajtjen e zgjedhjeve të parakohshme në Serbi. Protesta, e udhëhequr kryesisht nga studentët, është pjesë e një vale demonstratash antiqeveritare që po sfidojnë pushtetin e presidentit Aleksandar Vuçiç.

Protestat në Serbi kanë nisur pas tragjedisë së vitit 2024, kur 16 persona humbën jetën pas shembjes së një tende në stacionin hekurudhor në Novi Sad. Që prej atëherë, lëvizja protestuese është përhapur në disa qytete të vendit, duke kërkuar përgjegjësi politike dhe zgjedhje të parakohshme parlamentare.

Protestuesit, partitë opozitare dhe organizatat për të drejtat e njeriut pretendojnë se ngjarja është pasojë e keqmenaxhimit të projekteve publike dhe korrupsionit. Ata akuzojnë gjithashtu qeverinë për manipulim zgjedhor, kufizim të lirisë së medias dhe lidhje me krimin e organizuar, akuza të cilat presidenti Vučić dhe aleatët e tij i kanë mohuar vazhdimisht.

Në Novi Sad, protestuesit mbanin pankarta me mbishkrimin “Studentët po fitojnë” dhe brohorisnin slogane kundër qeverisë. Profesorja universitare Sanja Belić u shpreh para turmës se pa zgjedhje të lira dhe të ndershme, nuk mund të ketë ndryshim të vërtetë politik.

Aktivistët e lëvizjes studentore synojnë të sfidojnë partinë në pushtet në zgjedhjet e ardhshme. Megjithëse zgjedhjet parlamentare dhe presidenciale janë planifikuar për vitin 2027, presidenti Vučić ka lënë të hapur mundësinë që ato të mbahen më herët.

Në një deklaratë televizive, Vuçiç njoftoi gjithashtu se mbështetësit e tij do të organizojnë një tubim më 27 qershor, duke u bërë thirrje qytetarëve të mblidhen “nën flamurin serb”.

Serbia, si vend kandidat për anëtarësim në Bashkimin Europian, vijon të përballet me thirrje nga Brukseli për përparim në sundimin e ligjit, garantimin e zgjedhjeve të lira dhe luftën kundër korrupsionit.