Gjermani Dirk Schubel emërohet përfaqësues i posaçëm i BE-së në Kosovë

Dirk Schübel është emëruar Përfaqësues i ri Special i Bashkimit Evropian për Kosovën. Ai do ta marrë detyrën më 1 shtator 2026, me një mandat fillestar dyvjeçar, duke pasuar Aivo Oravin, ka njoftuar Këshilli i BE-së.

Dirk Schübel është shtetas gjerman dhe diplomat i lartë evropian me përvojë të gjerë në pozita drejtuese në Shërbimin Evropian për Veprim të Jashtëm (EEAS), Komisionin Evropian, si dhe në Ministrinë e Jashtme të Gjermanisë. Aktualisht ai shërben si drejtor i Divizionit për Rusinë në EEAS.

Më parë, ai ka qenë i Dërguar Special i BE-së për Partneritetin Lindor nga viti 2022 deri në vitin 2024. Gjithashtu, ka drejtuar Delegacionin e BE-së në Bjellorusi nga viti 2019 deri në vitin 2022 dhe Delegacionin e BE-së në Moldavi nga viti 2009 deri në vitin 2013, ku ka luajtur rol kyç në avancimin e angazhimit të BE-së me fqinjësinë lindore.

Mandati i Përfaqësuesit Special fokusohet në promovimin e një Kosove të qëndrueshme, demokratike dhe shumetnike, duke mbështetur perspektivën e saj evropiane përmes komunikimit publik dhe aktiviteteve të informimit. Përgjegjësitë kryesore përfshijnë monitorimin e progresit në prioritetet politike, ekonomike dhe të sigurisë, kontributin në konsolidimin e të drejtave të njeriut, sundimit të ligjit dhe mbrojtjes së pakicave, si dhe promovimin e koordinimit të përgjithshëm politik të BE-së për të siguruar një prani të bashkërenduar dhe të dukshme të Unionit.

Po ashtu, mandati përfshin ofrimin e udhëzimeve politike në nivel lokal për Misionin e Bashkimit Evropian për Sundimin e Ligjit në Kosovë (EULEX Kosovë) dhe mbështetjen e Dialogut Beograd–Prishtinë për të nxitur stabilitetin rajonal dhe marrëdhëniet e mira fqinjësore.