Euro shënon vlerën më të lartë që ka arritur në një vit

Që prej momentit që qeveria vendosi kufizime të lëvizjeve të qytetarëve, pasuar me mbylljen e një numri të lartë aktivitetesh ekonomike, euro filloi të rivlerësohej. Në 19 Mars, 1 euro kishte vlerën e 123.03 lekëve, vlera më e lartë që prej të paktën 5 muajsh; ndërsa një javë më vonë në 27 mars, sipas Bankës së Shqipërisë, 1 euro këmbehet me 125.4 lekë, vlera më e lartë prej afërsisht një viti.

Sipas ekspertëve dhe aktorëve të tregut, euro po rritet prej reduktimit të tregtisë për shkak të kufizimeve kufitare prej situatës së krijuar nga coronavirusi i ri. Gjithashtu oraret e reduktuara të qarkullimit të qytetarëve ka sjellë një rënie të shkëmbimeve valutore, që do të thotë se nuk ka një ofertë për valutë të huaj në treg. Të vetmit që janë duke blerë euro sipas aktorëve, janë aktivitetet e tregtimit ushqimor, pasi, sipas një akti normativ të qeverisë këto biznese duhet të sigurojnë furnizime për 3 muaj, por edhe se pse konsumi është fokusuar aty.

Disa aktorë janë shprehur se kjo është një situatë normale e tregut valutor, dhe që në fakt ka qenë leku i mbivlerësuar kundrejt euros, kjo për arsye të ofertës së lartë të valutave në treg, investimeve të huaja, apo edhe parave të futura në mënyrë informale në sistemin ekonomik.