Abdixhiku tregon komunat që fitoi LDK-ja në balotazh: Kosova kërkon maturi

Kryetari i Lidhjes Demokratike të Kosovës, Lumir Abdixhiku, ka shpallur fitoren e partisë së tij në pesë komuna pas përfundimit të balotazhit të zgjedhjeve lokale në Kosovë.

Në një konferencë për media të mbajtur nga selia qendrore e LDK-së në Prishtinë, Abdixhiku tha se mesazhi i qytetarëve ishte i qartë dhe se Kosova kërkon maturi përtej zhurmës.

“LDK, shtëpia e madhe e qytetarisë, sot ka fituar. Kemi fituar me ndershmëri, me përkushtim dhe me njerëzit më të mirë që ka ky vend,” deklaroi Abdixhiku.

Ai konfirmoi se LDK-ja ka siguruar fitoren në pesë komuna në balotazh — Prishtinë, Pejë, Viti, Dragash dhe Junik. Sipas rezultateve të publikuara nga KQZ-ja, kandidati i LDK-së për Prishtinën, Përparim Rama, prin me mbi 2000 vota ndaj kundërshtarit të tij nga Vetëvendosje, Hajrulla Çeku, duke siguruar kështu edhe një mandat të dytë si kryetar i kryeqytetit.

“Përparim Rama është kryetar i Prishtinës edhe katër vitet e ardhshme,” theksoi Abdixhiku, duke e quajtur rezultatin një fitore të qytetarisë dhe të maturisë politike.

Sipas tij, rezultati i këtyre zgjedhjeve tregon se qytetarët e Kosovës kanë zgjedhur stabilitetin dhe përgjegjësinë në vendimmarrje.

LEXONI GJITHASHTU:

• ​Përparim Rama shpall fitoren në Prishtinë
• Zgjedhjet lokale në Kosovë/ Dalin rezultatet e exit poll-eve, Rama fiton Prishtinën
• Abdixhiku: Vendi po shkon drejt zgjedhjeve të jashtëzakonshme