Carlos Alcaraz ka shkëlqyer sërish në arenën ndërkombëtare të tenisit, duke fituar titullin e turneut të Monte Karlos. Tenisti spanjoll triumfoi në një finale të fortë ndaj italianit Lorenzo Musetti me rezultatin 2-1 në sete, duke konfirmuar formën e tij të jashtëzakonshme në fushë.

Ky është trofeu i dytë sezonal për 21-vjeçarin pas suksesit në Roterdam në muajin shkurt. Me këtë fitore, Alcaraz ka siguruar një tjetër arritje të rëndësishme në karrierë, duke u ngjitur në vendin e dytë të renditjes botërore të ATP, duke lënë pas gjermanin Alexander Zverev.

Klasifikimin e përgjithshëm në botën e tenisit e kryeson aktualisht italiani Jannik Sinner, i cili vijon të ruajë epërsinë në pikë, por Alcaraz duket i vendosur për të sfiduar vendin e parë në vazhdim të sezonit.

Fitorja në Monte Karlos vjen si një konfirmim i nivelit të lartë të Alcaraz dhe ambicieve të tij për të dominuar skenën botërore të tenisit në muajt që pasojnë.