Ambasadori i BE-së: Kosovës i duhet urgjentisht një Kuvend dhe Qeveri e re

Ambasadori i Bashkimit Evropian në Kosovë, Aivo Orav, ka shprehur zhgënjimin e tij pas dështimit të radhës për konstituimin e Kuvendit të Kosovës nga deputetët e zgjedhur në zgjedhjet parlamentare të 9 shkurtit.

Duke folur nga holli i Kuvendit pas përfundimit të seancës konstituive të 52-të, Orav tha se vonesat institucionale po e dëmtojnë Kosovën dhe e bëjnë më të vështirë rrugën drejt integrimit evropian.

“Kosovës i duhet një Kuvend pak a shumë menjëherë. Kosovës i duhet një qeveri e re, një qeveri e re që do ta ndërtojë urën e re, një urë të re dhe të fortë mes Kosovës dhe Brukselit”, theksoi ai.

Orav theksoi se një qeveri funksionale dhe legjitime është çelësi për thellimin e bashkëpunimit me Bashkimin Evropian dhe përshpejtimin e procesit të anëtarësimit.

Në seancën konstituive të radhës ishin të pranishëm edhe përfaqësues ndërkombëtarë nga SHBA, Gjermania, Britania e Madhe dhe Franca.

“Ne erdhëm këtu me shpresa të mëdha, por fatkeqësisht prapë nuk ndodhi asgjë”, u shpreh ambasadori Orav, duke reflektuar mbi zhgënjimin e partnerëve ndërkombëtarë.

LEXONI GJITHASHTU:

• Ministri i Mbrojtjes, Maqedonci: Kosova po ndërton ushtri me standarde të NATO-s
• Marrëveshja me SHBA, Maqedonci: Kosova do të pajiset me helikopterë Black Hawk