Ambasadori i Ukrainës në Serbi: Nuk e kemi ndryshuar qëndrimin tonë për Kosovën

Ambasadori i Ukrainës në Serbi, Volodymyr Tolkach deklaroi se qëndrimi i Kievit zyrtar për çështjen e Kosovës nuk ka ndryshuar.

Tolkach komentoi në intervistë për RTK, qëndrimin e Kosovës për agresionin rus kundër Ukrainës, i cili sipas tij, është plotësisht në përputhje me Perëndimin dhe u shpreh mirënjohës për këtë.

“Ne kemi qenë gjithmonë të qëndrueshëm në politikën e jashtme dhe gjithmonë kemi mbështetur çdo vend brenda kufijve që njihen ndërkombëtarisht. Nga ana tjetër, Ukraina së bashku me vendet e tjera evropiane u përpoqën të ndalonin luftërat e përgjakshme në këtë rajon, siç ishte ajo e vitit 1999, por përpjekjet tona nuk mjaftuan.

“Prandaj sot jemi mirënjohës për mbështetjen që Kosova i jep Ukrainës, por në të njëjtën kohë ritheksojmë qëndrimin tonë parimor se duhet respektuar integriteti territorial dhe sovraniteti”, u shpreh ambasadori Tolkach.

Një ditë më parë, deputeti ukrainas, Oleksiy Goncharenko  u shpreh për “Euronews Albania”, se është koha që Ukraina të njohë pavarësinë e Kosovës.

Ai ka dorëzuar një draft-rezolutë në Parlament, ku bëhet thirrje që vendi të njohë pavarësinë e Kosovës.

LEXONI GJITHASHTU

• Serbët më kërcënuan për rezolutën për njohjen e Kosovës, thotë deputeti ukrainas
• Goncharenko tregon arsyet përse dorëzoi rezolutën për njohjen e Kosovës
• Deputeti ukrainas për Euronews Albania: Është koha që Ukraina ta njohë Kosovën