Andi Bushati e cilëson skandaloze deklaratën e Ramës në Bruksel

Dy analistët, Andi Bushati dhe Baton Haxhiu ndajnë mendime të ndryshme lidhur me vizitën e kryeministrit, Edi Rama sot në Bruksel.

Për z. Haxhiu, konferenca për shtyp ishte dinjitoze për kreun e qeverisë shqiptare duke vlerësuar deklaratën e bërë prej tij.

Por nga ana tjetër analisti shtoi se nuk pati asnjë të re nga takimet.

“Më pëlqeu shumë narracioni i Edi Ramës, ishte dinjitoz realisht dhe shihej përvoja e një politikani brenda dyerve të BE karshi Borrelit dhe kryetarit të për Zgjerim”, tha z. Haxhiu.

Ndërkohë Andi Bushati e cilësoi skandaloze sjelljen e Ramës me gazetarët shqiptarë pasi sipas tij u shfaq agresiv në një kohë kur BE e ka fshikulluar për ligjin represiv të medias

“Nuk mund të sillesh ashtu me gazetarët në një sallë europiane. Problemin Rama e ka me çdo gazetar që është kritik me të, nuk ka problemin me gazetarët shqiptarë”, tha ai.

Z. Bushati tha se përshtypje i bëri dhe deklarata se shqiptarët kanë qenë gjithnjë besnik ndaj perandorive, duke e krahasuar BE-në me Bashkimi Sovjetik apo Perandorinë Osmane.

Sipas tij kjo ironi e ka një justifikim dhe lidhet me dështimin për të hapur negociatat me BE.

“Pse Rama përdor këtë fjalor? Është njeriu që shqiptarëve u kishte premtuar që vit e parë do të hapte negociatat. Tani është në vitin e tetë dhe negociatat ende nuk janë hapur. Justifikimi i vetëm është që BE është si Bashkimi Sovjetik”, tha ai.

Sipas Bushatit, disa vende të BE nuk janë të bindura që Shqipëria i ka përmbushur kushtet kurse Haxhiu tha se vendimi i institucioneve të BE është për t’i hapur negociatat por disa vende specifike e kanë bllokuar procesin.