Aplikimet në universitete, degët më të kërkuara u ezauruan në raundin e parë

Pas përfundimit të raundit të parë të regjistrimeve në universitete, procesi ka shënuar një ecuri pozitive.

Afro 80% e maturantëve që aplikuan tashmë janë regjistruar në degët e preferuara.

“Raundi i parë pati një ecuri të mirë. Nga rreth 20 mijë maturantë që aplikuan, u regjistruan afërsisht 16 mijë. Kishte programe që u ezauruan menjëherë, sidomos ato me konkurs, si Infermieria e Përgjithshme, Arkitektura dhe Stomatologjia. Po ashtu, degët e Akademisë së Sigurisë dhe Mbrojtjes kanë pasur interes të lartë, sepse aty shkojnë ata që kanë vendosur qartë drejtimin e tyre dhe që kanë rezultate të mira”, tha Arjan Xhelaj, Drejtor i Përgjithshëm i RASH.

Ndërkohë, degë tradicionale si Ekonomia, Juridiku, Shkencat Sociale dhe Mësuesia kanë ruajtur stabilitetin në numrin e regjistrimeve. Megjithatë, pavarësisht përfundimit të raundit të parë, ende ka mundësi për mijëra të rinj që nuk kanë siguruar një vend.

“Kanë mbetur rreth 7 mijë maturantë që nuk janë regjistruar. Shumë prej tyre nuk kanë pasur rezultate të larta, por kanë ende mundësi, sepse në dispozicion janë afro 10 mijë kuota të lira në universitete. Raundi i dytë është një fazë ku maturantët duhet të jenë më realistë dhe të zgjedhin degë në përputhje me rezultatet që kanë,” u shpreh Xhelaj.

Sipas RASH, maturantët do të mund të aplikojnë për raundin e dytë përmes platformës U-Albania, ku do të publikohen kuotat e mbetura. Ky raund konsiderohet një mundësi e mirë për ata që synojnë të gjejnë një degë të përshtatshme dhe të sigurojnë regjistrimin në një program studimi.

Me përfundimin e raundit të parë, pjesa më e madhe e nxënësve ekselentë tashmë kanë siguruar degët e dëshiruara, ndërsa për mijëra të tjerë rruga drejt universiteteve mbetet ende e hapur në raundin e dytë.

LEXONI GJITHASHTU:

• Nis faza e dytë e rregjistrimit në universitete, 48 orë në dizpozicion
• Nisin regjistrimet në Universitetin e Korçës, cilat janë degët më të kërkuara