Administrata Tatimore e Kosovës (ATK) dhe Policia e Kosovës po kryejnë një aksion kundër bizneseve në veri të Kosovës, për shkak të dyshimeve se ato zhvillojnë veprime të kundërligjshme.
Kështu tha për Radion Evropa e Lirë zëvendësdrejtori i Policisë së Kosovës për rajonin e veriut, Veton Elshani.
“Në bazë të informacioneve të pranuara se në disa biznese në veri të vendit është duke u zhvilluar veprimtari e kundërligjshme, me autorizim të prokurorit kemi ndërhyrë dhe të njëjtat jemi duke i kontrolluar. Me neve është edhe ATK”, tha Elshani.
Radio Evropa e Lirë merr vesh se aksioni ka shënjestruar bankat e Kursimores së Postës së Serbisë, që operojnë në veriun e Kosovës të banuar me shumicë serbe dhe administratën e kasafortës të Bankës Popullore të Serbisë, në Mitrovicë të Veriut.
Po ashtu, pjesëtarë të Misionit të Bashkimit Evropian për Sundim të Ligjit në Kosovë (EULEX), janë parë duke marrë pjesë në aksionin në Zveçan.
Aksioni i autoriteteve të Kosovës, vjen një javë pasi Banka Qendrore e Kosovës njoftoi se ka përfunduar afati tranzitor për rregulloren e saj, që ndalon përdorimin e dinarit serb për kryerjen e pagesave.
Rregullorja e BQK-së, që parasheh euron si monedhën e vetme për kryerjen e pagesave, është kundërshtuar fuqishëm nga Serbia.
Serbia ndan ndihmë në vlerë të miliona eurove për serbët në Kosovë, të cilëve ua paguan rrogat, pensionet dhe ndihmën shtesë, në valutën serbe, dinar.
BQK-ja ka thënë më 13 maj se pas përmbylljes së periudhës transitore i ka licencuar tetë degë të institucioneve financiare në komunat me shumicë serbe, në Leposaviq, Zveçan, Graçanicë, Shtërpcë dhe një në Shillovë të Gjilanit.
Faktori ndërkombëtar i ka kërkuar Kosovës që të shtyjë zbatimin e rregullores së BQK-së, duke u thirrur në ndikimin që mund të ketë te komuniteti serb në Kosovë, që pranon pagesa të ndryshme në dinarë nga buxheti i Serbisë.
LEXONI GJITHASHTU:
- Monumentet e kulturës në Gjirokastër/ Turistët i përdorin për të promovuar talentet
- Gjykata në Londër i jep Assange të drejtën për të apeluar kundër SHBA
