Atmosferë e veçantë në Gjirokastër, 1200 artistë performojnë në festivalin folklorik

Organizimi i Festivalit Foklorik Kombëtar po krijon një atmosferë të veçantë në Gjirokastër si për banorët ashtu edhe për turistët që vizitojnë qytetin e gurtë.

Edicioni i 11, i Festivalit Folklorik do të organizohet në periudhën 24 qershor-1 korrik duke e kthyer Gjirokastrën në qendrën mbarëkombëtare të promovimit të vlerave të traditës dhe folklorit. Banorët dhe turistët vlerësojnë organizimin e festivalit dhe atmosferën festive në prag të nisjes së tij.

“Për ne është një event shumë i madh, është një event shumë i madh sepse kjo është historike. Ka 8 vjet që nuk është bërë Festivali Kombëtar, ndërkombëtar mund ta quajmë. Ju e shikoni vetë se çfarë pjesëmarrje ka. Ne jemi të organizuar që ti presim sa më mirë festivalistët, turistët e të gjithë që të lëmë vërtet gjurmë të mira që kudo që të shkojnë të tregojnë vërtet vlerat dhe cilësitë  e Gjirokastrës. Organizimi është shumë i mirë,  çdo gjë mundohemi që edhe neve të kontribuojmë në këtë organizim”,-tha Hajri Kashahu, adminsitrator biznesi.

“Atmosfera është shumë e bukur, ka shumë turistë të huaj që, vizitojnë qytetin e Gjirokastrës, qytetin e gurtë, dhe për festivalin që është një traditë shumë e bukur e qytetit të Gjirokastrës, vazhdon  akoma dhe duhet të vazhdojë të festohet”,-tha një vizitore.

“Ka shumë turistë është qytet I bukur dhe për mua vizita e parë këtu është e veçantë”,-tha turisti.

Edicioni i parë i Festivalit Folklorik Kombëtar është organizuar në vitin 1968 ndërsa tashmë festivali është kthyer në simbol të Gjirokastrës. Në edicionin e këtij vitit në skenën e Kalasë së Argjiros do të ngjiten rreth 1 200 artistë popullorë nga hapësira mbarëshqiptare, duke regjistruar një ndër organizimet më të mëdha në historikun e Festivaleve Folklorike.

LEXONI GJITHASHTU:

• “Beleri i burgosur politik”, Dule: Të lirohet menjëherë. Po shkelet sovraniteti
• Rikthimi i Bashës, Korreshi e Nallbati kundër, Alibeaj: Rëndësi ka gara e drejtë