Autonomia spitalore, mjekët mund të ofrojnë shërbim me pagesë jashtë orarit

Mjekët në spitale publike do kenë mundësi të ofrojnë shërbim për pacientët jashtë orarit të punës.

Këtë parashikon projektligji i ri i shërbimeve spitalore, ku ndër të tjera përfshihet edhe autonomia spitalore. Gjatë diskutimeve në komisionin e shëndetësisë pati edhe kundërshtime.

“Pse kemi strukturat spitalore ne të tilla që janë në gjendje të mbajnë edhe shërbime jashtë orarit, në opinionin tim jo”, tha deputeti i LSl, Petrit Vasili.

“Ka pacientë që për shkak të kohës nuk presin dhe shkojnë në privat, atëherë mund ta marrin këtë shërbim nga mjeku që pret ta bëjë këtë në praktikën e dyfishtë”, u shpreh deputeti socialist Florenc Spaho.

Të tilla shërbime do kenë kosto që do përcaktohet nga bordi drejtues i çdo spitali. Këtë e parashikon projektligji i ri që u miratua në komision, sipas së cilit organet drejtuese të spitalit do kenë autonomi në  Organizim, menaxhimi dhe financim.

Sipas qeverisë ky model do të çojë në eliminimin e abuzimeve.

Por, praktikat ndërkombëtare kanë treguar se një nga dobësitë e spitaleve autonome lidhet me transparencën.

“Në bazë të këtij ligji do marrësh shërbim më të mirë, për faktin se spitalet me anë të autonomisë që ato do kenë do i menaxhojnë shumë më mirë të ardhurat e tyre”, u shpreh zv.ministrja e Shëndetësisë, Rakacolli.

Autonomia menaxheriale aplikohet si fillim në Spitalin Memorial në Fier. Spitalet e tjera do kenë të drejtë të marrin kartën e autonomisë pas miratimit të ligjit në Kuvend dhe daljes së kritereve që duhet të përmbushë çdo spital.

LEXONI GJITHASHTU:

• Reformë në sistemin shëndetësor, Rama: Autonomia e spitaleve nis nga QSUT
• Hetimet për koncesionin, SPAK tërheq dokumentet e sterilizimit nga spitalet