Avokati: Gjykata s’na besoi, dokumentet tona u bënë akt ekspertimi ligjor

Avokati i Saimir Tahirit, Dritan Jahaj tha për “Review” në Euronews Albania se dokumentet që ata kanë dorëzuar ndërsa kërkonin lirimin e ish-ministrit janë bërë akt ekspertimi ligjor.

Sipas tij, gjykata nuk i ka besuar dhe është vërtetuar nga mjekësia ligjore që gruaja e Tahirit kishte probleme shëndetësore të cilat nuk e lejonin të kujdesej si duhej për fëmijën e tyre të mitur, kusht ky që i ka mundësuar lirimin nga burgu ish-ministrit të Brendshëm.

“Në rastin e Tahirit ne i kemi depozituar gjykatës të gjitha aktet, pra indiciet për problemet shëndetësore të bashkëshortes, ato ekzaminime që ka realizuar bashkëshortja, probleme shëndetësore që i ka pasur prej shumë vitesh. Nëse gjykata do të kishte besuar thjesht atë dokumentacionin mjeko-ligjor që kishim depozituar ne hajde këtu diskutonim, por gjykata tha jo, unë s’të besoj ty. Ke një indicie që më vë në dukje që ka probleme shëndetësore dhe unë thërras mjekësinë ligjore. Është bërë një akt, janë thirrur ekspertët pranë mjekësisë ligjore, kanë ardhur, kanë hartuar aktin mjeko-ligjor dhe kanë konkluduar në rastin konkret që këto probleme shëndetësore ishin të vërteta. Nuk kishte asnjë shans që të përfitonte Saimir Tahiri pa u evidentuar nga ana e ekspertëve mjeko-ligjorë,” – u shpreh Jahaj.

LEXONI GJITHASHTU:

• “Mund të punësohet”- Avokati i Tahirit zbulon kufizimet e të drejtat e ish-ministrit
• Avokati i Tahirit zbulon kushtin që plotësoi ish-ministri për lirimin