Avokati i Veliajt i kërkon Këshillit Bashkiak dokumentacionin e shkarkimit

Mbrojtësi ligjor i kryetarit të Bashkisë së Tiranës, Erion Veliaj, avokati Alban Dokushi, i është drejtuar zyrtarisht Këshillit Bashkiak të Tiranës me një kërkesë për të vënë në dispozicion të plotë dokumentacionin administrativ që lidhet me procedurën e inicuar për shkarkimin e Veliajt nga posti.

Në kërkesën e paraqitur, avokati Dokushi kërkon praktikën e plotë administrative të ndjekur nga Këshilli Bashkiak, përfshirë aktet që mbështesin nismën për shkarkim, procesverbalet e komisioneve dhe mbledhjeve përkatëse, si dhe çdo dokument tjetër shoqërues që është pjesë e kësaj procedure.

“Kjo kërkesë bëhet në funksion të garantimit të së drejtës së mbrojtjes ligjore dhe respektimit të procedurave transparente, duke qenë se z. Veliaj është palë e drejtpërdrejtë e prekur nga ky proces,” thuhet në dokumentin zyrtar.

Avokati kërkon gjithashtu që vendimi për shkarkim dhe relacioni shpjegues i tij të dorëzohen së bashku me konfirmimin e Prefektit të Qarkut Tiranë. Në fund të kërkesës janë bashkëngjitur edhe prokura e përfaqësimit dhe karta e avokatit.

Ende nuk ka një reagim zyrtar nga Këshilli Bashkiak i Tiranës lidhur me këtë kërkesë.

LEXONI GJITHASHTU:

• Sllovakia miraton amendament kushtetues, ka vetëm dy gjini mashkull dhe femër
• Erion Veliaj dërgon vendimin në Gjykatën Kushtetuese: Shkarkimi ishte i paligjshëm