Baza e vetme ajrore e NATO në Ballkanin Perëndimor, gjenerali: Pse u zgjodh Kuçova

Është hapur zyrtarisht sot baza e NATO-s në Kuçovë. Inaugurimi i kësaj baze u bë përmes një ceremonie zyrtare, pjesë e të cilës ishin personalitete të shumta të vendit dhe jo vetëm.

Gjenerali Aleksandër Pando tregoi në emisionin Now në Euronews Albania se avionët që u panë në ceremoni erdhën vetëm me rastin e inaugurimit. Ai tregoi se Shqipëria ka në flotën e saj Black Hawk,

që do qëndrojnë aty dhe avionët pa pilotë Bajraktar, ndërsa avionët e ceremonisë së sotme u sollën nga Italia dhe dy F16 nga pala amerikane.

“Investimi i bazës së NATO ka kushtuar 55 mln euro, 50 mln janë nga fondi i përbashkët i aleancës dhe 5 mln nga fondi i qeverisë shqiptare. Pozicioni i Kuçovës është një pozicion strategjik, në gjithë Ballkanin Perëndimor NATO nuk ka një bazë të vetën ajrore. Edhe për kushtet e motit, Kuçova, nga pilotët që kanë fluturuar atje është një bazë që asnjëherë nuk mbulohet nga mjegulla për shkak të pozicionit, luginave”, tha gjenerali.