“Bëjnë kritika në hava”, Rama: Tirana sot, fuqia më e madhe tërheqëse e turizmit

Kryeministri Rama tha në mbylljen e fushatës së Partisë Socialiste në Tiranë, se kryeqyteti nuk është më i njëjti që ka udhëhequr ai vetë, pasi zhvillimi ka qenë i madh e tashmë Tirana është fuqia më e madhe tërheqëse e turistëve.

Gjithashtu ai tha se fuqia më e madhe tërheqëse e turistëve janë apartamentet prej të cilëve qytetarët po fitojnë shumë të ardhura. Ai tha se këto apartamente që lihen me qira, nuk janë ende pjesë e ekonomisë së formalizuar dhe nuk do fiskalizohen edhe për disa kohë.

“Tirana nuk ka qenë asnjëherë një destinacion turistik. Nuk ka qenë asnjëherë vendi që gjeje në revista si destinacion turistik, sot Tirana është fuqia më e madhe tërheqëse e turistëve. Kjo do të thotë më shumë ekonomi, më shumë të ardhura.

Numri i hoteleve që janë ndërtuar dhe do ndërtohen është mbresëlënës, por ka një element shumë të rëndësishëm, që shumëkush që “bën kritika në Hava” nuk do ta shikojë. Fuqia më e madhe tërheqëse e turistëve në Tiranë , nuk janë hotelet, por apartamentet që janë me mijëra dhe sot shërbejnë për të mirëpritur turistë.

Familjet që i kanë ato apartamente fitojnë të ardhura që kurrë nuk do i kishin imagjinuar nga apartamentet e tyre. Kjo shifër nuk është ende pjesë e ekonomisë së formalizuar, sepse do duhej të fusnim shumë familje të Tiranës në këtë ngarkesë fiskale dhe do vazhdojë të jetë e tillë edhe për disa kohë, sepse duam të kthejmë Tiranën në qendër të turizmit. Tirana sot nuk është Tirana që kam udhëhequr unë”,-tha Edi Rama.

LEXONI  GJITHASHTU:

• Rama: Ambicia jonë, ta bëjmë Shqipërinë vendin me pagat më të larta në rajon
• Veliaj thirrje për të votuar këshillin bashkiak: Pas pak orësh hapim piramidën