Belind Këlliçi për primaret në PD: Pse kam ofertë më të mirë se Gerti Bogdani

Deputeti i Partisë Demokratike, Belind Këlliçi beson se ka një ofertë më të mirë se Gerti Bogdani, në garën e primareve brenda selisë blu, proces i cili do të nxjerrë kandidatin përballë kryebashkiakut të Tiranës, Erion Veliaj.

Në një intervistë për Euronews Albania, Këlliçi u shpreh se Bogdani e nderon garën brenda PD-së, por shtoi se ai e ka faktuar me prova angazhimin dhe aksionin politik ndaj Veliajt.

“Për Gertin shumë mirë, është kandidat që e nderon garën, është një djalë demokrat që ka qenë deputet. Nderon procesin e primareve dhe modelin të cilin Partia Demokratike vendos përballë Veliajt. Unë gjykoj që kushdo që futet në këtë garë, jep një mesazh të fortë se në PD ka rënë miti i kryetarokracisë, është një model shumë i mirë për politikën shqiptare. Cilido nga ne që do të futet në këto primare, ofron një model më të mirë se Veliaj. Fiton ndershmëria e kandidatëve tanë.

Gjykoj që kam ofertë më të mirë. Gjykoj që e kam dhënë me prova që kam qenë një nga zërat më vokalë në denoncimin e aferave më të mëdha të Veliajt. Gjykoj që natën e shembjes së Teatrit Kombëtar, arrestimi që më është bërë nga Policia e Shtetit, është provë reale e qëndresës sime si qytetar i Tiranës. Gjykoj që në çështjen e inceneratorëve, dokumentin autentik e kam nxjerrë unë në Komisionin Hetimor. Për betonizimin kam folur gjatë gjithë kohës. Aksioni im politik dhe angazhimi im si deputet i PD-së në kryeqytet, është një avantazh në këtë garë”, theksoi Këlliçi.

Deri më 6 nëntor të gjithë kandidatët që do marrin pjesë në primaret e brendshme të Partisë Demokratike duhet të kenë dorëzuar dokumentacionin.

Kur kanë mbetur edhe pak ditë nga mbyllja e këtij afati, deri më tani vetëm 2 kandidatë janë regjistruar për të marrë pjesë në primaret e 4 dhjetorit.

Belind Këlliçi dhe Gerti Bogdani shpalosën ambicien e tyre për të qenë kandidatë të opozitës në garën për bashkinë e tyre.

LEXONI GJITHASHTU

• “Do t’ia bësh si Eduard Selamit”, Bushati replika me Berishën për primaret
• Zgjedhjet lokale, emrat e kandidatëve të mundshëm për primaret e PD-së
• Gara për Tiranën brenda PD, në pritje për konfirmim Julian Deda dhe Ilir Alimehmeti