Censi shtyhet sërish| Dështon tenderi i I-padeve, regjistrimi derë më derë në 2023

Regjistrimi i banesave dhe popullsisë, i planifikuar për t’u zhvilluar në tetor është pezulluar. Shkak është bërë mosgjetja e kompanisë që siguron pajisjet për të kryer intervistat derë më derë.

Regjistrimi i popullsisë dhe banesave nuk mund të kryhet këtë vit. INSTAT thotë se nuk ka siguruar mjetet e nevojshme për të grumbulluar informacion në terren, edhe pse faza e trajnimeve me intervistuesit thuajse u ezaurua.

Procesi u shty për vitin e ardhshëm, pasi tenderi për blerjen e Ipad-eve që duhet të përdoren për mbledhjen e të dhënave derë më derë, dështoi.

Regjistrimi, i cili bëhet një herë në 10 vjet, ishte planifikuar të zhvillohej në vitin 2020, por fillimisht u shty prej situatës së krijuar nga pandemia, dhe një tjetër shtyrje u bë për në vitin 2021 për shkak të zgjedhjeve parlamentare.

Censi parashikohet të zgjasë dy muaj me një kosto prej rreth 16 milionë euro.

Pyetësori i parë derë më derë në vendin tonë është bërë në vitin 1923. Ai realizohet rregullisht një herë në 10 vjet me qëllimin për hartimin e strategjive socio-ekonomike dhe planeve për zhvillim të qëndrueshëm në nivel kombëtar, rajonal dhe lokal.

LEXONI GJITHASHTU:

• Shqiptarët, pjesë e censusit në Serbi, aplikohet pas 10 vitesh
• Mbi 29% e popullsisë në RMV shqiptarë, publikohen të dhënat e Censusit