Çështja Gërdeci| Zbardhet dëshmia e rojës së fabrikës së demontimit të armëve

Vazhdon seanca në Gjykatën e Posaçme kundër Korrupsionit dhe Krimit të Organizuar për çështjen Gërdeci.

Deri më tani kanë dëshmuar 5 persona, mes tyre ishte edhe Fejzi Shehu i cili ka shërbyer si roje zëvendësues tek fabrika e demontimit të armëve.

“Unë isha roje tek porta kryesore e fabrikës së demontimit. Aty futeshin punëtorët dhe dilnin kamionët. Ditën e shpërthimit isha në punë, tek porta kryesore dhe më erdhi një familjar i një personi që kërkonte t’i jepte ushqimin. Qesen e mora unë dhe jam futur brenda deri tek porta e dytë, aty pashë flakën nga një karrocë dhe njerëzit filluan të bërtisnin për shkak të barutit. Flaka u përhap me shpejtësi. Nuk munda ta fusja ushqimin brenda dhe jam larguar me vrap. Më pas aty kam mësuar se bëheshin saldimet e karrocave të dorës. Kam parë Qemal Deliun që atë ditë ka dal dy-tre herë jashtë me lejen e përgjegjësit. Emrin e tij e kam mësuar më pas, sepse nuk e dija si emër,” – u shpreh Shehu.

Gjatë seancës ka pasur debate të shumta mes palëve. Dëshmitarët Ferizan dhe Zamira Durdaj u pyetën nëse të afërm të tyre kishin punuar aty. Po ashtu diskutimi më i madh u bë sepse Firuzan Durdaj nuk tregoi në gjykatë që djali i tij i madh kishte punuar në fabrikën e demontimit të armëve për 1 muaj e gjysmë dhe kishte marrë një shumë prej 15 mijë lekësh.

Avokatët e Mediut kërkuan që të administrohet dëshmia e dhënë në vitin 2008 nga Firuzan Durdaj para prokurorëve. Po ashtu ata kanë shpjeguar të gjithë atë çfarë dinin për ditën e ngjarjes.

“Gërdeci është krim shtetëror dhe përgjegjësi ka gjithë piramida e shtetit. Nuk kam gjë personale me Fatmir Mediun,” – deklaroi ndërkaq Zamira Durda.

Ajo kishte me vete edhe dy fletoret e djalit që humbi jetën.

LEXONI GJITHASHTU:

• Humbi të emën në shpërthimin e Gërdecit, Laçi: Në fabrikë fillova punë 14 vjeç
• Deklarata e ish-prokurores Imeraj: Ja pse ‘21 Janari’ dhe “Gërdeci” nuk u hetua