Kreu i LZHK-së, Dashamir Shehi nuk mohoi “zullumet” që janë bërë në politikën shqiptare, siç i quajti ai, por tha se financimet ruse nuk i beson.
“Që këtu ka parti që marrin para ruse kjo është një përrallë kot fare. Unë nuk e besoj njëherë,” – deklaroi Shehi për Euronews Albania.
Sipas kreut të LZHK-së, ata që mbajnë mend rublat janë komunistët. Ai tha se në 32 vite politikë dollarë ka parë goxha, por rubla jo.
“I gjithë ky llumi që i vjen akoma vërdallë partisë së punës e ka mendjen te rublat, se e ka akoma mendjen te Bashkimi Sovjetik,” – deklaroi Shehi.
Mazhoranca së fundmi ka vënë në dukje financimet ruse të opozitës, duke përdorur shpesh termin rubla dhe “bedelët e Putinit”.
Edhe në protestën e 12 nëntorit, kryeministri Rama dhe kreu i grupit parlamentar të PS-së, Taulant Balla sollën në vëmendje se si në asnjë nga fjalimet nuk u përmend agresioni rus në Ukrainë.
LEXONI GJITHASHTU:
- Berisha apo Alibeaj? Kë mbështet Dashamir Shehi?
- A duhet të largohen Meta dhe Berisha? Shehi: Nevojë për forca të reja në fushë
