Deklaratat e Vuçiç se do të vizitojë Kosovën, Sveçla: Arrestohet po nuk mori leje

Ministri i Brendshëm, të Kosovës, Xhelal Sveçla, ka komentuar deklaratën e para disa ditëve të Presidentit të Serbisë, Aleksandër Vuçiç, se shumë shpejt do ta vizitojë Graçanicën.

Ministri Sveçla tha se nëse presidenti i Serbisë tenton të hyjë pa marrë leje më parë ai do të arrestohet.

“Si po mendoni ju që dikush, shtetas i huaj mund të futet në Republikën e Kosovës pa lejen e institucioneve të Kosovës”, tha ai.

“Pasoja është që thjesht nuk ke shtet nëse kreu i shtetit tjetër futet pa leje në territorin tënd, unë nuk besoj që Vuçiq është aq i krisur që të vijë në Kosovë pa leje.

Është çështje vendimmarrëse e Kryeministrit në qoftë se ka kërkesë, a i jep leje apo jo Vuçiqit. E, për pa leje, pastaj dihet cilat institucione merren me të”, vijoi Sveçla.

Ministri i Brendshëm, Xhelal Sveçla, në ATV, ka treguar detaje lidhur me aksionin Policisë së Kosovës në qershor, ku në Zveçan u gjet sasi e madhe e armatimit. Këto, tha Ministri, janë sjellur në mënyrë të organizuar nga Serbia, për t’i furnizuar strukturat e tyre kriminale në Kosovë.

Sveçla ka treguar se ky kontigjent i takon organizatës së ashtuquajtur “Severna Brigada”. Sipas ministrit të Brendshëm këto janë armatime të reja, të prodhuara në Beograd, dhe jo nga koha e luftës.

Ky armatim për të cilin ka folur Ministri ishte gjetur në një veturë me targa të Beogradit në Zveçan.

Brenda veturës janë gjetur armatime të ndryshme, mjete shpërthyese si dhe radiolidhje me numër brenda saj, veshje ushtarake dhe 19 emblema të Brigadës së Veriut e cila u shpall nga Kosova si organizatë terroriste.

LEXONI GJITHASHTU:

• Priten tensione në veri të Kosovës, eksperti zbulon planin e Vuçiç
•  “U ekspozova ndaj një skenari”, Kurti: Lajçak e Vuçiç me shpërfillje të koordinuar