Deputeti gjerman: RMV-ja të miratojë ndryshimet kushtetuese për propozimin francez

Deputeti gjerman, Michael Roth i ka bërë thirrje Maqedonisë së Veriut që të miratojë ndryshimet kushtetuese, pasi sipasj tij, kjo do të përshpejtojë procesin e anëtarësimit në Bashkimin Evropian.

Roth, i ka bërë këto deklarata pas një vizite që ka realizuar më 31 gusht në Shkup.

Ai është shprehur se ndryshimet kushtetuese nuk janë të lehta, por duhet të ndodhin me angazhimin e të gjitha subjekteve politike.

“E di që nuk është e lehtë për shumëkënd kur bëhet fjalë për ato ndryshime kushtetuese, por secili duhet ta pyesë veten, jo si mund ta ndihmojë partinë time, por si mund ta ndihmojë dhe të kontribuojë për vendin tim”, theksoi Roth pas takimit me presidentin maqedonas, Stevo Pendarovski.

Ndryshimet e Kushtetutës, me të cilat pakica bullgare në Maqedoninë e Veriut do të njihej si popull shtetformues, janë pjesë e dokumentit të njohur si “propozimi francez”.

Ky propozim i ka hapur rrugë fillimit formal të negociatave të anëtarësimit midis Maqedonisë së Veriut dhe BE-së, në muajin korrik.

LEXONI GJITHASHTU

• Mickoski: Parlamenti të pranojë nismën për referendum kundër propozimit francez
• Referendumi për kushtetutën, opozita në RMV kundër përfshirjes së bullgarëve
• Publikohet protokolli i firmosur nga Maqedonia e Veriut dhe Bullgaria