Dhëndri i Trump do investojë në Shqipëri/ Shehu: I mirëpritur nëse zbaton ligjet

Deputeti i Partisë Demokratike, Tritan Shehu ishte këtë të diel i ftuar në një intervistë për Euronews Albania ku ndër të tjerat komentoi edhe lajmin që Jared Kushner, dhëndri i ish-presidentit të SHBA-së Donald Trump, ka shfaqur interesin për të investuar në Shqipëri.

Shehu tha se çdo investitor serioz duhet të jetë i mirëpritur në vendin tonë, pasi investimet e huaja serioze gjithmonë i kanë sjellë rritje ekonomisë së vendit. Megjithatë ai shtoi se investimet duhen bërë në përputhje të plotë me ligjet shqiptare.

“Çdo investitor serioz që do të investojë në Shqipëri është i mirëpritur në zbatim të ligjeve shqiptare. Partia Demokratike ka qenë porta e madhe e investimeve të huaja në Shqipëri. Sukseset më të mëdha ekonomike te ne kanë ndodhur nga investimet e mëdha. Ne ulëm taksat, krijuam lehtësi fiskale, ulëm procedurat administrative. Rritja e madhe në vitin 2005 bazohet në stimulimin dhe tërheqjen e investimeve të mëdha në Shqipëri, sigurisht brenda ligjit dhe kushtetutës shqiptare. Çdo njeri është i lirë të investojë në Shqipëri duke respektuar ligjet tona.

I pyetur për investimet në zonën  e mbrojtur të Zvërnecit, Shehu tha se çdo gjë duhet bërë në përputhje me ligjet shqiptare ndërsa theksoi se nuk mund të merret me detaje teknike, pasi nuk e ka këtë kompetencë.

LEXONI GJITHASHTU:

• Dhëndri i Trump investime në Sazan/ Rama: Kundërshtarët po delirojnë për parkun
• Bloomberg: Dhëndri i Donald Trump bisedime për investime në Sazan