Dita e 24-tët e protestave në Tiranë, pas dy orësh fjalimesh para Kryeministrisë qytetarët marshojnë në rrugët e kryeqytetit

Pedagogu Erlis Çela bëri një bilanc politik të protestës që po zhvillohet prej 24 ditësh në Tiranë, duke argumentuar se humbësit më të mëdhenj deri më tani janë qeveria shqiptare dhe Partia Demokratike.

I ftuar në emisionin Now në Euronews Albania, Çela tha se pas më shumë se tre javësh protesta, debati duhet të fokusohet te pasojat politike dhe te aktorët që kanë fituar ose humbur nga kjo lëvizje qytetare.

“Politikisht, pas 24 ditësh, pyetja që duhet të bëhet është kush ka humbur dhe kush ka fituar nga kjo protestë. Për mua, humbësit e mëdhenj janë qeveria dhe PD, por nuk jam i sigurt kush ka fituar më shumë”, u shpreh ai.

Sipas Çelës, protesta ka hyrë në një fazë më të pjekur, ku vëmendja nuk është më vetëm te reagimi qytetar, por edhe te alternativat politike dhe platformat që mund të përfaqësojnë kërkesat e protestuesve.

Ai theksoi se edhe drejtuesit e partive të vogla po analizojnë ndikimin që kjo lëvizje mund të ketë në skenën politike.

“Tani po flasim për një lloj pjekurie të protestës, por flasim për emra, për platforma dhe në këtë moment edhe kryetarët e partive të vogla, si Shehaj, Qori dhe Lapaj, po e bëjnë këtë llogari: çfarë na ka sjellë kjo gjë?”, tha Çela.

Ish-deputeti Enkelejd Alibeaj tha në emisionin Now në Euronews Albania se gjëja më e mirë që duhet të bëjë kryeministri Edi Rama në këtë fazë të lëvizjes është të japë dorëheqjen.

Kjo, sipas tij, nuk ka gjasa të ndodhë, pasi Rama do të vazhdojë luftën e fortë, sepse vetë sistemi që ka ngritur nuk e lejon të largohet në këtë mënyrë.

“Pyetja është a do të gjejë kurajon të përballet Rama. Në një situatë normale, një njeri që është në krye të qeverisë duhet të lexojë arsyet. Flamingoja ishte shkaku, këta njerëz kanë dalë për shumë gjëra. Nuk ka më shans Rama të dialogojë dhe as të pranohet si interlokutor. Te Goxhaj, Rama do që përmes këtij debati të krijojë një lloj dialogu me protestuesit, por kam përshtypje që as këtë s’e arrin dot.

Në këtë fazë që ka arritur lëvizja, ajo që duhet të ndodhë është që të dalë një ditë të bukur dhe të japë dorëheqjen. Në këtë fazë Rama është i urryer. Unë nuk besoj që do ta bëjë, do të vazhdojë luftën e fortë, se nuk është i lirë ta bëjë, sepse nuk e lejon i gjithë sistemi që ka ngritur”, tha Alibeaj.

I ftuar në një lidhje live në emisionin “Now me Erla Mëhillin”, studiuesi Auron Tare shpjegoi se pse i ka dalë në mbrojtje ish-luftëtarit të UÇK-së, Dritan Goxhaj, pas reagimeve menjëherë pasi ai lexoi pesë kërkesat e protestuesve. Ishte vetë kryeministri Edi Rama, por edhe eksponentë të Partisë Socialiste, e kanë kritikuar ashpër atë, duke e akuzuar për qëndrime pro-iraniane dhe duke risjellë në vëmendje episode të ndryshme nga e kaluara e tij.

Duke komentuar këtë debat, Tare tha se nuk ka miqësi personale me Goxhajn dhe se e ka takuar vetëm një herë në jetën e tij megjithatë, ai theksoi se njeh historinë e familjes së tij dhe vlerëson kontributin që, sipas tij, ajo ka dhënë për çështjen e Kosovës.

Sipas studiuesit, jo vetëm Dritan Goxhaj, por edhe babai, nëna dhe motra e tij kanë qenë të përfshirë dhe të angazhuar për kauzën e Kosovës. Tare kritikoi klasën politike shqiptare, duke e akuzuar se shpesh nuk di të vlerësojë njerëzit që kanë sakrifikuar apo kanë kontribuar për interesa kombëtare.

Sipas Tares, sulmet ndaj ish-luftëtarit të UÇK-së për faktin se mori fjalën në protestë janë të padrejta dhe përbëjnë një “autogol” politik për ata që i ndërmarrin.

“Shiko, do t’ju them që zoti Rama është një mjeshtër i debatit publik dhe për vite me radhë kur nuk ishte në këtë pozicion kishte një penë të jashtëzakonshme në këto debate që bënte. Tani këto i ka kthyer në rolin e një drejtuesi të lartë për të shmangur vëmendjen në çështjen kryesore, për të shmangur pesë pikat. Merret me Dritan Goxhajn. Unë Dritanin vetëm një herë kam takuar, s’kam shoqëri me të, por atë që di për Dritanin dhe babai i tij që ka qenë pedagog në Shkollën e Bashkuar, ku unë kam mbaruar studimet, të dy bashkë si rrallëherë edhe nëna e tij dhe motra e tij kanë qenë në Kosovë dhe kanë qenë të dedikuar për çështjen e Kosovës. Pas këtij angazhimi të madh, të dy nuk janë parë mirë si nga qeveritë socialiste ashtu edhe nga ato demokratike dhe mua më ka irrituar fakti që politika shqiptare për njerëzit që sakrifikojnë dhe i japin vendit, në përgjithësi sillet keq. Marr shkas çfarë bën Greqia për Belerin, që është shqiptar dhe mbështet Greqinë, ndërsa shohim Dritanin, të cilin unë e marr si shembull se sa jo korrekte është politika jonë ndaj figurave të njerëzve që kanë kontribuar sado pak për çështjen. Për këtë arsye reagova dhe më vjen shumë keq që kryeministri dhe njerëz të tjerë, ministra, publikojnë gjëra të pavërteta për Goxhajn dhe mendoj që është autogol i madh për ta, pasi ai njihet shumë mirë nga njerëz që janë përfshirë në ngjarjet e Kosovës. Nuk mendoj që është e drejtë të sulmohet një njeri se pse doli për të folur, aq më tepër kur ka kontribuar për çështjen e Kosovës”, tha Tare.

Pedagogu Ervis Iljazaj tha në emisionin Now në Eurones Albania se sulmi i kryeministrit Edi Rama ndaj Dritan Goxhajt, i cili një ditë më parë doli si organizator i protestës, është strategji dhe “i vetmi instrument që i kishte mbetur për të fituar betejën e komunikimit me opinionin”.

Sipas tij, detyra e një kryeministri nuk është që të sulmojë protestën por të dëgjojë protestuesit që janë dhjetëra mijëra qytetarë shqiptarë.

“Kur ti e ke humbur betejën me argumente, merresh me njeriun. Kushdo që të dilte në krye, me sa duket strategjikisht Rama mezi po priste që të dilte koka, se kishte humbur çdo lloj debati tjetër dhe i vetmi instrument për ta fituar betejën e komunikimit me opinionin ishte atakimi i atyre që do të shfaqeshin si organizatorë të protestës. Pra, është e gjitha strategji.

Por ajo që bën përshtypje këtu është që një kryeministër i një vendi, nuk ndodh në asnjë vend që protesta të sulmohet. Protesta dëgjohet, nuk sulmohet. Janë dhjetëra e mijëra qytetarë të Shqipërisë, një kryeministër duhet t’i dëgjojë.

Në ata protestues ka njerëz të infiltruar? Patjetër që mund të ketë, por këto janë efekte kolaterale të protestës.

Ajo është një shpërthim kundër sistemit politik të mbyllur, të bazuar në dy njerëz dhe përjashtues.

Kemi 30 vjet që ky vend qeveriset vetëm nga dy njerëz”, tha Iljazaj.

Në ditën e 24-t të protestës, disa pjesëmarrës kanë vendosur shirita të skenës së krimit dhe një sirenë policie përpara godinës së Kryeministrisë.

Protestuesit dëgjohen duke thirrur “Policia është me ne”, ndërsa një vajzë me megafon në dorë qëndron mes dy efektivëve të policisë.

Pasi qëndruan për rreth dy orë para Kryeministrisë në ditën e 24-të të protestës, ku disa prej tyre mbajtën fjalime, protestuesit nisën më pas marshimin e natës në rrugët e kryeqytetit, me pankarta në duar kundër qeverisë.

Thirrjet e tyre vijuan pa ndërprerje, ku dominonin, “Poshtë diktatura”, “Rama jep dorëheqjen dhe Shqipëri e re”.

Nga podiumi u bë thirrje që kushdo që dëshiron mund të qëndrojë përpara Kryeministrisë, siç kanë vepruar që prej së shtunës.

Gjithashtu, protestuesve iu rikujtua të pastrojnë bulevardin nga mbeturinat.

Kryeministri Edi Rama ka reaguar sërish mbrëmjen e së martës lidhur me Dritan Goxhajn i cili një ditë më parë lexoi 5 kërkesat e protestuesve.

Rama ka shpërndarë në Facebook e tij një video të shoqëruar me shënimin: Dje “Komandant” me pagesë, po sot shërbëtor me çfarë?

Protesta e aktivistëve dhe qytetarëve qytetarëve kundër qeverisë vijoi edhe sot në ditën e saj të 24-tët në Tiranë.

Gjatë tubimit, një prej protestuesve iu drejtua të pranishmëve duke bërë të ditur se më 4 korrik diaspora shqiptare pritet t’i bashkohet sërosh protestës në shesh.

Sipas tij, kjo pjesëmarrje do të shërbejë si mbështetje për realizimin e kërkesave të parashtruara nga protestuesit.

“Kam një njoftim pasi qëndrestarët dolën me disa pika politike kundër autokratit. Kemi marrë shumë mesazhe nga diaspora dhe më 4 korrik e gjithë diaspora do të vijë këtu në mbështetje tuaj që ato pika të realizohen. Më 4 korrik e gjithë diaspora do të jetë këtu. Ju faleminderit”, u shpreh protestuesi.

Kujtojmë se të shtunën, më 20 qershor, shqiptarë nga diaspora ishin në protestë, ndërsa data 4 korrik është njoftuar sot si dita tjetër e ardhjes së tyre në Tiranë.

Protestuesi Erlis Sina, të cilit kryeministri Edi Rama iu drejtua këtë të martë me një mesazh publik, i ka kthyer përgjigje nga protesta.

Gjatë fjalës së tij, ai tha se Rama kishte tentuar ta paraqiste si mik në mesazh, por sipas tij, kjo ishte e pamundur, pasi kryeministri, siç u shpreh ai, ka tradhtuar interesat e shqiptarëve.

Ai shtoi se nuk mund të ketë miqësi me kryeministrin, të cilin e akuzoi si përgjegjës për problemet e qytetarëve dhe për situatën aktuale në vend.

“Unë jam Erlis Sina, ai i cili Rama u zgjua sot në mëngjes dhe tentoi të bëhej miku im. Por përgjigjen që ia dhashë aty, po ja jap edhe këtu. Unë s’mund të bëhem miku i Ramës, sepse Rama ka tradhtuar Shqipërinë dhe shqiptarët. Ndaj Edi Rama unë nuk jam si ti. Ti nuk mund të qash hallet e mia, sepse ti je shkaktari i tyre”, tha ai.

Sina tha se gjatë 24 ditëve të protestave, sipas tij, është tentuar përçarja e protestuesve dhe etiketimi i tyre me akuza të ndryshme.

“24 ditë je munduar të na përçash, të na bësh agjentë iranianë, grekë, serbë. Je munduar të na etiketosh. Ne jemi të gjithë shqiptarë. Për ne Shqipëria është e para”, u shpreh ai.

Në vijim të fjalës së tij, ai tha se protestuesit janë të vendosur për largimin e kryeministrit nga pushteti, duke shtuar se, sipas tij, “është koha për llogaridhënie”.

“Sot ka ardhur dita të largojmë Ramën nga pushteti. Rama u ka thënë shqiptarëve ‘fuck you’. Ne kemi vetëm një përgjigje për të: Rama jepe dorëheqjen”, tha Sina mes të tjerash.

Më herët gjatë mëngjesit, kryeministri Edi Rama i ishte drejtuar publikisht protestuesit, duke theksuar se ai ishte përfshirë në një “vorbull të turmës” dhe se, sipas tij, bindjet e tij po keqpërdoreshin.

Në mesazhin e tij, Rama shkruante se e shihte protestuesin jo si humbës, por si një individ me bindje personale të forta, duke shtuar se ai besonte se protestuesi kishte një shqetësim të brendshëm që po e shtynte të ishte pjesë e protestës.

Në ditën e 24-t të protestës, një nga përfaqësuesit e saj deklaroi gjatë fjalimit se protestuesit po i kujtojnë kryeministrit pse janë në këtë protestë.

Në deklaratën publike drejtuar qytetarëve dhe mbështetësve, ai renditi një sërë kërkesash, duke theksuar se protesta është paqësore dhe mbarëpopullore dhe kërkon:

“1. Dorëheqjen e panegociueshme të kryeministrit dhe të gjithë qeverisë.
2. Krijimin e një qeverie teknike tranzitore për jo më pak se 12 muaj.
3. Ndryshime kushtetuese dhe miratimin e tyre me referendum, ku përfshihet ndryshimi i Kodit Zgjedhor, që sipas tij ka marrë peng vendin që prej vitit 2008.
4. Ndryshime në ligjin për financimin e partive politike, pasi sipas deklaruesit, përmes tij financohen nga paraja e krimit dhe drogës.
5. Kufizimi i ushtrimit të detyrës së kryeministrit në jo më shumë se dy mandate.

Po ashtu, ai rikujtoi edhe kërkesat e mëparshme, si anulimin e ndryshimeve në ligjin për zonat e mbrojtura, anulimin e ndryshimeve në ligjin për trashëgiminë kulturore, shfuqizimin e “Paktit të Maleve” dhe statusit të investitorit strategjik.

Sipas tij, këto përbëjnë “kontratën e re sociale” mes qytetarëve dhe shtetit, ndërsa theksoi se çdo veprim i mëtejshëm do të vendoset pas diskutimeve me qytetarët, duke nënvizuar vijimin e protestës paqësore, demokratike dhe qytetare deri në përmbushjen e kërkesave.

Ka nisur edhe këtë të martë, në ditën e 24-t të protestave, marshimi i protestuesve nga sheshi “Skënderbej” në bulevardin “Dëshmorët e Kombit” drejt godinës së Kryeministrisë në Tiranë.

Me thirrjet “qeveria e krimit”, “Rama në burg Berisha në burg”, “Edi Rama pritet popullin se po vjen” dhe “Shqipëri e re”, protestuesit kanë vijuar marshimin në bulevard dhe janë ndalur përpara godinës së Kryeministrisë.

Një incident verbal ndodhi këtë të martë në nisje të protestës në ditën e 24-tët, kur aktivistë dhe qytetarë ishin mbledhur në sheshin “Skënderbej” në Tiranë për tubimin e radhës.

Situata u tensionua për një moment mes një qytetareje, e cila mbante një fëmijë në krahë, dhe aktivistit Arben Kola, gjatë kohës kur ky i fundit po i drejtohej protestuesve me megafon dhe po jepte thirrje për vijimin e marshimit drejt Kryeministrisë.

Qytetarja ndërhyri duke kundërshtuar mënyrën se si po zhvillohej protesta duke kritikuar organizatorët e protestës se po ndikonin negativisht në vijimësinë dhe fuqinë e protestës nga dita në ditë. Sipas saj, një pjesë e qytetarëve dhe emigrantëve nuk janë lejuar të shprehen lirshëm, gjë që sipas saj ka krijuar pakënaqësi dhe ka ulur energjinë e protestës.

Qytetarja: “Duhet revoltë o vëlla! A ke revoltë? Apo vetëm megafonin në dorë?”
Arben Kola: “Po mos të kisha revoltë, s’do të kisha dalë këtu në shesh!”
Qytetarja: “S’është revoltë kjo, me paqe!”
Arben Kola: “Si është revolta?”
Qytetarja: “Unë i dal përballë atij! Unë jam e para që vij!”

Në vijim, qytetarja vijoi me akuza ndaj mënyrës së organizimit:

Qytetarja: “Erdhën emigrantët dhe i përzutë!”
Arben Kola: “Kush i përzunë?”
Qytetarja: “I përzutë ju, s’i latë të flisnin! U bë rrëmujë aty! Po bie protesta çdo ditë prej jush! Ne duam të ikim te parlamenti tani, pse na drejtoni te Kryeministria? Kush je ti që më drejton mua?”

Qytetarja: “Ju të ndaloni, thoni mos!”

Arben Kola vazhdoi me thirrjet e tij të zakonshme për dorëheqje dhe për bashkim të protestuesve, ndërsa më pas nisi marshimi drejt Kryeministrisë në Tiranë.

Gjatë marshimit, qytetarja vijoi të shprehte pakënaqësitë e saj, duke ngritur shqetësime për mënyrën e organizimit dhe për drejtimin e protestës. Sipas saj, protestuesit duhet të kishin më shumë hapësirë për të vendosur vetë drejtimin e tubimit dhe për të shprehur lirshëm revoltën e tyre.

Në një deklaratë të mëvonshme para kamerave, ajo u shpreh me tone emocionale.

“Vjen emigranti i revoltuar, del ai tjetri i thotë mos fol? Dua të shpërthej se s’mban më! Si unë ka 1000 të tjerë”, tha ajo.

Debati u shoqërua edhe me qëndrime të tjera nga protestuesit, ku disa mbështesnin vazhdimin e marshimit drejt Kryeministrisë ndërsa zonja kërkonte rrethimin e parlamentit.

Pavarësisht tensionit të momentit, tubimi vijoi normalisht dhe protestuesit u drejtuan drejt godinës së Kryeministrisë, ku vijuan thirrjet dhe qëndrimi i tyre i zakonshëm kundër qeverisë dhe kryeministrit Edi Rama.

Deputetja Marjana Koçeku ka reaguar sërish në rrjetet sociale, duke publikuar një letër të hapur drejtuar kryeministrit Edi Rama. Në mesazhin e saj, ajo shpreh mbështetje për protestuesit, kritikon qeverinë për mungesë dialogu me qytetarët dhe i bën thirrje kreut të qeverisë të dëgjojë kërkesat e qytetarëve, duke e konsideruar dorëheqjen si një akt në shërbim të së mirës së përbashkët.

Kreu i Partisë Demokratike, Sali Berisha ka komentuar deklaratat e kryeministrit Edi Rama për “Financial Times”, duke e cilësuar si një gjuhe të papranueshme në një media ndërkombëtare. Duke folur për gazetarët, Berisha theksoi se dënon sharjet e pakualifikueshme që Rama ka përdorur ndaj shqiptarëve gjatë intervistës. Sipas tij, reagimi i Ramës ka qenë “shokues” për gazetaren dhe publikun ndërkombëtar të pranishëm në intervistë.

“Së dyti, përsëri përshëndes dhjetëra mijëra qytetarë, të cilët në kushte të jashtëzakonshme të një vape të paparë, mbushën përsëri dje rrugët dhe bulevardet e Tiranës gjer në orët e para të mëngjesit, duke kërkuar largimin e menjëhershëm të narkodiktatorit. U bëj thirrje qytetarëve shqiptarë, i madh dhe i vogël, t’i bashkohen kësaj proteste në çdo kohë dhe në çdo rast. Kësaj proteste madhështore që mbjell shpresë në çdo zemër shqiptare. I bëj thirrje diasporës të mbetet si gjer sot, e angazhuar në këtë mision të madh të shpëtimit të Shqipërisë nga një regjim që në shumë aspekte e ka dëmtuar në ekzistencën e vet kombin shqiptar më shumë se çdo regjim tjetër para tij.

Dënoj me forcën më të madhe sharjet e pakualifikueshme që Edi Rama u bën shqiptarëve në mediat më të mëdha ndërkombëtare. U garantoj se as Gadafi, as Sadami, as Maduro nuk i kanë lejuar vetes gjuhën që Edi Rama ka përdorur në Financial Times ndaj shqiptarëve. Ky ka dëshmuar urrejtjen e pakufishme që ka ndaj qytetarëve shqiptarë. Sharja e tij ishte shokuese për gazetaren dhe audiencën e pranishme. Edi Rama nuk sillet si padrino, shumë më keq se padrino i Shqipërisë.

Edi Rama konsideron Shqipërinë një sulltanat të kohërave të shkuara, në të cilin vetë ai bën sulltanin, gjykatësin, policin dhe çdo funksion tjetër. Edi Rama duhet të largohet një minutë e më parë. Edhe prapa diellit të shkojë, shkon si një hajdut i pashoq i kombit të tij. Shkon si njeriu që ndërtoi në Shqipëri narkoshtetin e parë dhe të vetëm në Evropë. Shkoi si një tradhtari i një kombi që bëri gjithçka, kreu gjenocid të kalkuluar ndaj tij për t’i përzënë shqiptarët nga Shqipëria, një armik i egër i shqiptarëve në Shqipëri, në Kosovë dhe kudo në botë,” tha Berisha.

Kryeministri Edi Rama ka reaguar sërish në rrjetin e tij social “Facebook” teksa ka publikuar një foto të një protestuesi. Rama ka ngritur pyetjen se në llogari të kujt një hoxhë është futur në protestë teksa shtoi se ai e ka vendin në xhami e të drejtojë lutje.

Ai shkruan hoxha duhet të predikojë të vërtetën dhe të mos fshehë dijen. Sipas tij hoxha nuk duhet të bëjë punën e shejtanit duke futur xixa mes shqiptarëve.

“Ah, pra unë e paskam ditur diçka kur ia tregova shqiptarëve këtë “hero” të flamingove. Po pyetja ime tani është, po ti o hoxhë për llogari të kujt je futur në protestë se vendi yt është në xhami dhe për ty që duhet të drejtosh lutjet, Kurani thotë se mbi kurrizin tënd rëndon një përgjegjësi e madhe, për të paqtuar shpirtrat, për të predikuar të vërtetën dhe për të mos e fshehur dijen?¿

Pra shkurt llafi, të mos luash kukamçefthi hoxhë, e të mos bësh punën e shejtanit duke futur xixa mes shqiptarëve, se nuk ia ka borxh askujt ky vend ndezjen e zjarreve të dasive fetare, as mesveti, as me botën.

Askush të mos dyshojë se do t’ia lejoja vetes të merresha kështu me këdo protestues që s’ka mizë në vesh kur flet, se po t’ia lejoja s’do respektoja rolin dhe detyrën time ndaj shqiptarëve. Po shqiptarët, në daç në punë, në daç në protestë e në daç në kafe, s’mund të lejojnë që këta të mizave instaluara në vesh, t’i nxisin keq e më keq kundër njëri-tjetrit…”, shkruan Rama.

Unioni i Sindikatave zhvilloi këtë të martë një protestë para Ministrisë së Financave, në vijim të aksioneve protestuese që prej 24 ditësh po mbahen para Kryeministrisë.

Gjatë tubimit, përfaqësues të sindikatave dhe protestuesit ngritën shqetësimet e tyre lidhur me kushtet e punës, nivelin e pagave dhe largimin e profesionistëve nga vendi. Ata kërkuan ndërhyrje konkrete nga institucionet për të përmirësuar situatën e punonjësve në sektorë të ndryshëm.

Në fjalën e tyre, protestuesit theksuan pesë kërkesat kryesore që, sipas tyre, duhet të jenë prioritet i politikave qeveritare.

Kërkesat e Unionit të Sindikatave janë:

1. Më shumë investime në shërbimet publike;
2. Paga të drejta dhe kushte dinjitoze pune;
3. Mbrojtja e vendeve të punës dhe e të drejtave sindikale;
4. Ndalimi i largimit të profesionistëve nga vendi;
5. Një tranzicion dixhital i drejtë që respekton të drejtat e punonjësve.

Kryeministri Edi Rama këtë të martë ka dalë me një reagim tjetër në rrjetet sociale. Reagimi i tij ka ardhur lidhur me ish-luftëtarin e UÇK-së dhe përfaqësuesin e grupit koordinues të protestës, Dritan Goxhaj, i cili lexoi 5 kërkesat kryesore të qytetarëve që vijojnë marshimin e tyre prej 22 ditësh.

Rama në postimin e tij e ka cilësuar Goxhajn një manipulator gjysëm taleban e gjysëm mitoman teksa shtoi se ai nuk e hedh një pikë balte mbi flamurin e UÇK-së. Ai gjithashtu ka publikuar një dokument të vitit 1999, ku sipas saj Goxhaj kishte deklaruar:  S’më ka marrë koka erë si im atë që të luftoj në Kosovë.

“Po mos bre mos ja kajni nanën krejt, çfarë komandant i leshit more”… Këto ishin fjalët e një burri me disa të vrarë në familje, që më çoi dokumentin bashkëngjitur sot në sabah!

Ndërsa këto janë fjalët e mia:

Ej, trima, jo për një manipulator gjysëm taleban e gjysëm mitoman, po për krejt botën sikur të ma falin, nuk e hedh një pikë balte unë mbi flamurin e UÇK-së”, shkruan Rama.

Qytetari Erlis Sina ka reaguar këtë të martë ndaj një statusi të publikuar më herët nga Kryeministri Edi Rama, në të cilin, sipas tij, është përdorur fotografia e tij në lidhje me protestën qytetare që po zhvillohet në Tiranë dhe që ka hyrë në ditën e 24-t.

Përmes një postimi në rrjetet sociale, Sina thekson se nuk pranon të identifikohet me figurën e kryeministrit dhe e akuzon këtë të fundit si përgjegjës për problematikat që, sipas tij, kanë shtyrë qytetarët të protestojnë.

“Mos më thuaj se te fotografia ime sheh veten tënde. Unë nuk jam ti. Nuk jam ai që ka pushtetin prej vitesh në dorë. Nuk jam ai që firmos vendime që ndryshojnë jetët e njerëzve”, shkruan Sina në reagimin e tij.

Ai vijon me kritika të drejtpërdrejta ndaj qeverisjes, duke e cilësuar kryeministrin si “autor të emigrimit të mijëra të rinjve”, të padrejtësive dhe të arrogancës së pushtetit.

Në reagimin e tij, Sina ndalet edhe te protesta qytetare në kryeqytet, duke argumentuar se pjesëmarrësit nuk dalin në shesh si rezultat i ndikimit të algoritmeve, influencuesve apo forcave politike, por për shkak të problemeve të përditshme me të cilat përballen.

“Mijëra njerëz nuk mbushin sheshet sepse i manipulon algoritmi. Nuk protestojnë sepse ua kërkojnë influencerat. Nuk zemërohen sepse ua dikton opozita. Ata dalin në shesh sepse jetojnë realitetin çdo ditë”, shprehet ai.

Sina shkon më tej duke deklaruar se qytetarët protestojnë për shkak të vështirësive ekonomike, shërbimeve publike dhe largimit të të rinjve nga vendi, ndërsa akuzon kryeministrin se po përpiqet të minimizojë arsyet e revoltës qytetare.

Në fund të mesazhit, ai i kërkon Ramës të mos përdorë fotografinë e tij për të justifikuar apo mbuluar, sipas tij, dështimet e qeverisjes.

“Fotografia ime në murin tënd më bën pis. Mos e përdor për të larë përgjegjësitë e tua. Mos e përdor për të fshehur dështimet e tua. Unë nuk jam ti”, përfundon reagimin e tij.

Reagimi i Sinës vjen pasi më herët gjatë së martës, Kryeministri Edi Rama publikoi një mesazh të gjatë drejtuar protestuesve të tubimit që po zhvillohet në Tiranë prej 24 ditësh, ku përdori edhe fotografinë e qytetarit.

Në mesazhin e tij, Rama deklaroi se nuk i sheh protestuesit si humbës, por si qytetarë që kanë mbetur besnikë ndaj bindjeve dhe shqetësimeve të tyre. Kryeministri tha se shumë prej tyre mund të jenë të nxitur nga probleme reale që lidhen me ekonominë, pronën, mjedisin, shëndetësinë apo padrejtësitë sociale.

Njëkohësisht, kreu i qeverisë argumentoi se zemërimi i qytetarëve shpesh shfrytëzohet nga aktorë politikë, komentatorë, influencerë dhe mekanizma të rrjeteve sociale për interesa të ndryshme, ndërsa u bëri thirrje protestuesve të mos lejojnë që hallet e tyre të përdoren nga të tjerët.

Pikërisht ndaj këtyre qëndrimeve dhe përdorimit të fotografisë së tij në postimin e kryeministrit, Erlis Sina publikoi kundërpërgjigjen, duke theksuar se është “thjesht një qytetar” dhe se pjesëmarrja e tij në protestë buron nga bindjet dhe përvoja e tij personale, jo nga ndikimi i faktorëve politikë apo mediatikë.

Grupi Parlamentar i Partisë Demokratike i ka kërkuar Kuvendit zhvillimin me urgjencë të një mocioni me debat në seancë plenare, duke argumentuar se protestat e vazhdueshme qytetare dhe çështjet që lidhen me transparencën e qeverisë kërkojnë një diskutim të menjëhershëm në Parlament.

Kërkesa, e firmosur nga kryetari i Grupit Parlamentar të PD-së, Gazment Bardhi, vjen në prag të mbylljes së punimeve të Kuvendit për këtë sesion parlamentar, e parashikuar të zhvillohet të enjten.

Demokratët argumentojnë se kërkesat e ngritura nga protestuesit në tubimet e fundit qytetare përbëjnë çështje me interes të lartë publik dhe duhet të marrin përgjigje institucionale përmes debatit parlamentar.

Sipas dokumentit të depozituar në Kuvend, protestuesit kanë artikuluar pesë kërkesa kryesore: dorëheqjen e qeverisë, shfuqizimin e kuadrit ligjor për investimet strategjike, anulimin e kuadrit ligjor të njohur si “Paketa e Maleve”, shfuqizimin e ndryshimeve në ligjin për zonat e mbrojtura dhe anulimin e ndryshimeve në ligjin për trashëgiminë kulturore shqiptare.

PD thekson se këto janë çështje që opozita i ka ngritur prej kohësh në Kuvend dhe për të cilat ka depozituar edhe nisma ligjore konkrete për shfuqizimin e akteve përkatëse.

Në kërkesën drejtuar Konferencës së Kryetarëve dhe drejtuesve të Kuvendit, demokratët nënvizojnë se debati parlamentar është i domosdoshëm për të garantuar transparencë dhe llogaridhënie përballë shqetësimeve të ngritura nga qytetarët.

Po ashtu, Partia Demokratike rikujton se më herët ka kërkuar zhvillimin e një mocioni me debat edhe mbi raportin e fundit të Parlamentit Europian dhe progresin e Shqipërisë në procesin e integrimit europian, duke vlerësuar se gjetjet dhe rekomandimet e raportit meritojnë një diskutim të posaçëm në Kuvend.

Kryeministri Edi Rama i është përgjigjur Financial Times lidhur me protestave kundër korrupsionit dhe transparencës, siç flitet nga protestuesit, mbi resortin luksoz të lidhur me dhëndrin e Trump.

Kryeministri Edi Rama ka mohuar të jetë “Kumbari” i Shqipërisë pas javëve të protestave kundër korrupsionit të nxitura nga zhvillimi i një resorti luksoz të lidhur me dhëndrin e Donald Trump. I ashtuquajturi “Revolucioni i Flamingove” u ndez nga zemërimi publik mbi projektin e planifikuar prej 4 miliardë dollarësh të Jared Kushner dhe Ivanka Trump në një ishull dhe pranë një rezervati natyror të njohur për flamingot e tij. Protestuesit i kanë bërë thirrje Ramës të japë dorëheqjen dhe të ndiqet penalisht për atë që ata e perceptojnë si korrupsion sistemik që i lejon investitorët ndërkombëtarë të ndërtojnë në tokë të mbrojtur.

“Njerëzit thonë se unë jam udhëheqësi i gjithë kësaj. Unë u them shkoni në djall. Aq thjeshtë,” tha ai.

“Nuk më takon mua të vërtetoj se nuk jam Kumbari, i takon atyre të vërtetojnë se jam Kumbari”.

Prokurorët shqiptarë kanë lëshuar urdhër-arreste për më shumë se një duzinë biznesmenësh për trafik droge dhe pastrim parash, përfshirë një që kishte pasur më parë në pronësi tokë në zonën që do të zhvillohet nga Kushner dhe gruaja e tij, Ivanka Trump. Një zëdhënës i Kushner dhe partnerëve të tij të tjerë në Shqipëri nuk iu përgjigj kërkesave për koment.

Rama këmbënguli se investimet e Kushner ishin të rregullta dhe nuk kishte asnjë lidhje me hetimin në vazhdim ndaj një pronari të mëparshëm të tokës.

“Të thuash se ekonomia shqiptare është bazuar në pastrimin e parave, kjo është e tmerrshme,” tha Rama për FT në zyrën e tij me pamje nga bulevardi ku dhjetëra mijëra njerëz kanë demonstruar çdo natë për më shumë se tre javë.

 “Pastrimi i parave është pjesë e ekonomisë sonë, por nuk është një problem aq i madh,” shtoi ai.

“Mendoni se nuk ka pastrim parash në Londër? Ka. Por a mund të thoni se ekonomia britanike është në pjesë të madhe pastrim parash? Jo”.

Prokurorët shqiptarë kundër korrupsionit kanë lëshuar urdhër-arreste për 20 biznesmenë që ata thanë se ishin të përfshirë në trafik ndërkombëtar droge dhe pastrim parash. Dyshohet se miliarda euro janë kanalizuar në projekte të mëdha ndërtimi përgjatë bregdetit të Adriatikut dhe në kryeqytetin shqiptar.

Midis biznesmenëve të shënjestruar është Artur Shehu, një shtetas i dyfishtë SHBA-Shqipëri që jeton në Miami. Shehu në vitin 2025 i shiti tokë pranë rezervatit natyror ku folezojnë flamingot kompanisë “Albania Land Development”, një kompani e lidhur me projektin Kushner. Kjo marrëveshje ra nën vëzhgimin e prokurorëve kundër korrupsionit, të cilët ngrinë 128 milionë euro pagesa në pritje të hetimit. Shehu nuk iu përgjigj kërkesave për koment.

Rama argumentoi se qeveria e tij i lejoi prokurorët të ndiqnin çështjet në mënyrë më agresive, gjë që rriti gjithashtu perceptimin se vendi ishte i mbushur me korrupsion dhe krim të organizuar.

“Në fakt është e kundërta. Shqipëria po lufton si kurrë më parë dhe është shumë më pak e korruptuar sot sesa ishte”.

Ai përsëriti akuzat se protestat ishin nxitur nga armiqtë e presidentit amerikan, përfshirë Iranin. “Ka shumë interes për ta vrarë këtë projekt… për shkak të Trump,” tha ai.

 “Nëse nuk do të ishte Jared Kushner… askujt nuk do t’i bëhej vonë për flamingot, për Shqipërinë, për asgjë. Është e gjithë urrejtja kundër Trump që krijon gjithë këtë shqyrtim”.

Ai tha se ishte i bindur se planet e zhvillimit bregdetar do të ecnin përpara pavarësisht protestave.

“Pjesa e rëndësishme është se investitorët nuk janë kriminelë dhe nuk janë të përfshirë në pastrim parash,” tha Rama.

“Ata janë investitorë të mëdhenj. Është një shans historik për Shqipërinë”.

Kryeministri Edi Rama ka reaguar mëngjesin e kësaj të marte lidhur me protestën që po zhvillohet në Tiranë dhe që ka hyrë në ditën e saj të 24-t.

Përmes një statusi të gjatë në rrjetet sociale, kreu i qeverisë iu drejtua protestuesve me një mesazh reflektues, duke deklaruar se nuk i sheh ata si humbës të një proteste, por si qytetarë që kanë mbetur besnikë ndaj bindjeve të tyre dhe shqetësimeve që mbartin.

“Nuk të shoh si humbësin e një proteste, po si njeriun e mbetur vetëm me bindjet e tij”, shkruan Rama në nisje të mesazhit, duke theksuar se shumë prej pjesëmarrësve mund të jenë motivuar nga shqetësime reale për mjedisin, ekonominë, pronën, shëndetësinë apo padrejtësitë sociale.

Kryeministri shprehet se e kupton zemërimin e qytetarëve dhe problemet me të cilat përballen, duke u ndalur te rastet e punëdhënësve që shkelin të drejtat e punonjësve, burokracia shtetërore apo vështirësitë ekonomike dhe sociale.

Në reagimin e tij, Rama akuzon figura politike, komentatorë, influencerë dhe aktorë të tjerë publikë se kanë përdorur protestuesit për interesat e tyre, duke i nxitur dhe më pas duke i lënë të vetëm.

Sipas tij, ata që e paraqitën protestën si një revoltë popullore kundër qeverisë, sot nuk ndodhen më pranë protestuesve, ndërsa përfitimet e tyre politike, mediatike apo personale mbeten të paprekura.

Kreu i qeverisë kritikon gjithashtu atë që e quan ndikim të algoritmeve të rrjeteve sociale, profileve të rreme dhe fushatave digjitale, duke argumentuar se zemërimi publik shpesh përdoret për të krijuar perceptime të rreme dhe për të manipuluar opinionin.

Në një pjesë të mesazhit, Rama ndalet edhe te përgjegjësitë brenda administratës shtetërore, duke pranuar se ka raste kur zyrtarë apo vartës të institucioneve shpërdorojnë besimin, sillen keq me qytetarët apo kërkojnë favore dhe përfitime të paligjshme.

“Shpesh më ndodh edhe mua të kem zgjime të zbrazëta me të njëjtën shije”, shkruan ai, duke bërë një paralelizëm mes ndjenjës së zhgënjimit të protestuesve dhe përvojave të tij në drejtimin e qeverisë.

Në fund të mesazhit, kryeministri i bën thirrje protestuesve të mos lejojnë që shqetësimet dhe hallet e tyre të përdoren nga të tjerët për interesa politike apo personale.

Ai shprehet se është i gatshëm të dëgjojë kritikat e tyre dhe se respekton të drejtën e çdo qytetari për ta konsideruar kundërshtar politik.

“Pyete vetë veten nëse armiku yt jam unë”, shkruan Rama, ndërsa e mbyll reagimin me një mesazh të drejtpërdrejtë drejtuar protestuesve: “Unë jam miku, jo armiku yt”.

Reagimi i kryeministrit vjen në ditën e 24-t të protestës në Tiranë, e cila ka vijuar me pjesëmarrjen e qytetarëve dhe debate të forta politike mbi kërkesat dhe qëllimet e saj.