Djegia e flamurit shqiptar në RMV, 20-vjeçari arrestohet për nxitje urrejtje

Djegia e flamujve po kthehet në trend në Maqedoninë e Veriut. Të rinj që djegin flamuj dhe i shpërndajnë nëpër faqe në rrjetet sociale, për të treguar trimërinë e tyre.

Kështu tentoi të vepronte edhe një 20 vjeçar në qendër të Shkupit, por u kap në flagrancë nga një nëpunës policor dhe përfundoi në paraburgim.

Një javë pasi ndodhën trazirat në Shkup, e më pas edhe në Kumanovë dhe Prilep, policia ka arrestuar 18 persona. Katër prej tyre janë në paraburgim, por gjithsesi askush nga autorët e djegies së flamurit shqiptar në Kumanovë nuk është vënë nën pranga.

Në një video të siguruar, shihet qartë se si dy të rinj vjedhin flamurin shqiptar në një objekt privat, e më pas e djegin.

Edhe pse Ministri i brendshëm, Pançe Toshkovski, bëri thirrje të gjithë qytetarëve dhe mediave që kanë prova për vepra penale që ti dorëzojnë tek organet e rendit, nuk pati përgjigje konkrete për këtë rast.

“Ju siguroj se për gjithçka që mund të mbledhim prova që dëshmojnë se ka vepër penale do të veprojmë. Ministria e Punëve të Brendshme do të veprojë ndaj të gjithëve që nuk ia duan të mirën Maqedonisë. Secili që nxit çfarëdo urrejtje apo urrejtje ndëretnike e që ka prova, më besoni se do të procedohet”,-tha Pançe Toshkovski, ministër i punëve të brendshme.

Ende nuk ka lajm zyrtar nga Policia as për policin që largoi dhe hodhi në tokë flamurin shqiptar në Kumanovë.

LEXONI GJITHASHTU:

• 120 raste në ditë më grip në Gjirokastër, shtohen rastet tek të moshuarit
• Me flamuj kuqezi dhe këngë patriotike, shqiptarët e RMV drejt Tiranës për Kombëtaren