Dyfishohet çmimi i druve në Korçë, qytetarët: Vdekje me sy hapur

Korça është një nga qytetet më të ftohta në Shqipëri gjatë dimrit dhe qytetarët kanë nisur të marrin masa për ngrohje.

Gjatë dy javëve të fundit është vënë re dyfishimi i çmimit të druve, çka për qytetarët kostoja bëhet e papërballueshme, sidomos për pensionistët.

“Jetesën jo pensionisti që e ka shumë të vështirë ta përballojë me këto çmime që është lënda drusore, por edhe një mesatar nuk i përballon dot, detyrohet të hyjë në borxh, të shkrijë atë pak dhjame që ka grumbulluar, kështu që e ka të vështirë sepse çmimi i druve ka shkuar shumë lart. Unë i kam marrë para 3 muajsh i kam marrë 50 mije lek te vjetra. Ka që i kanë marrë 60 edhe 70, pra është një tmerr, drurin tonë e marrim me çmim shumë të lartë, është e vështirë shumë”, thotë një qytetar.

“60 mijë lekë metri, e papërballueshme. Nga e keqja do i marr, fakt i kryer dje i mora. Vjet e mora 47 dhe 43. Unë mora 10 metër dru, 600 mijë, do i pres shkojnë 630 mijë”, shprehet një tjetër.

Ditwn e djeshme është mbajtur takimi në nivel qarku i thirrur nga prefekti i qarkut Korçë, ku është shoqëruar me debate të forta midis kryetarëve të bashkive të juglindjes dhe përfaqësuesve të pushtetit qendror.

Për kryetarin e bashkisë Korçë, territori që ai administron mund të mbulojë vetëm 15% të kërkesës së qytetarëve, çka e komplikon situatën.

“Fatkeqësisht bashkia e Korçës me sipërfaqen e saj pyjore mund të japë leje dhe mund të furnizojë me 6000 metër serë, 2400 plotësojnë kopshtet e çerdhet, pjesa tjetër është për popullatën. Kërkesa është disa herë me e madhe, ka vlerësime të ndryshme, ne plotësojmë diku rreth 10-15% të nevojës së banorëve për dru zjarri me sasinë që furnizojmë brenda bashkisë”, shprehet Filo.

Për prefektin Nertil Jole duhet të bëhet një planifikim më i mirë për vitet në vijim, duke u bërë thirrje bashkive të krijojnë projekte disavjeçare.

“Unë mendoj që në perspektivën afatgjatë është shumë e rëndësishme që të bëhet një planifikim më e mirë, prandaj e vura theksin që bashkitë kanë përgjegjësi të përmbushin detyrimet institucional dhe ligjor për të hartuar plane e mbarështimit pyjor, që është brenda territorit që ato administrojnë por e të bëjnë plane operacionale vjetore që të shfrytëzuar ato sasi që vijnë nga krasitja sanitare, me miratimin e Ministrisë së Mjedisit, të stabilizohet çmimi duke qenë se është shqetësim e ka tendencë rritëse se ka kërkesë të lartë por sasi të pamjaftueshme”, thotë prefekti i Qarkut Korçë.

Vitin e kaluar një metër dru kushtonte 35-40 mijë lekë të vjetra, ndërkohë këtë vit kushton 65-70 mijë lek të vjetra.

LEXONI GJITHASHTU:

• Nis festa e birrës në Korçë, muzikë dhe ushqime tradicionale
• Muzeu Arkeologjik në Korçë i dëmtuar nga tërmeti, Koki: Do ndërhyhet në shtator