E dhunuara keniane, Xheni Karaj: S’ka reagim sepse s’është nga një vend perëndimor

Rasti i 22-vjeçares nga Kenia, për aktivisten Xheni Karaj nuk ka ngjallur reagim për shkak të origjinës.

Ajo tha në “Good morning Albanians” se e njëjta gjë nuk do të ndodhte për një të dhunuar nga një vend perëndimor.

“Vjen nga Kenia, nga një vend i varfër, nga një vend ku institucionet nuk iu kërkojnë llogari institucioneve shqiptare se çfarë po ndodh me qytetarët e tyre, se unë jam e sigurt nëse një rast i tillë do i kishte ndodhur një qytetari francez, amerikan, anglez, e kujtdo vendi perëndimor këtu do ishte bërë nami,” – tha Karaj.

Sipas saj në kushte të tjera do çoheshin në këmbë gjithë institucionet, por fakti që e dhunuara është nga Kenia e ka mbajtur situatën më në kontroll.

22-vjeçarja nga Kenia me iniciale J.A punonte në një nga kazinotë e kryeqytetit dhe mesnatën e 13 gushtit ajo humbi kontakte me familjarët e saj.

Kanë qenë shoqet e saj që e kanë identifikuar në gjendje kritike për jetën. Ajo është transportuar fillimisht në QSUT dhe më pas drejt Spitalit të Traumës.

Mjekët bëjnë me dije se e reja ka 3 brinjë dhe kocka të thyera, lëndime në dorë dhe stomak si dhe dëmtime në tru.

LEXONI GJITHASHTU:

• Duhen rreth 500 mijë euro për operacionin e vajzës keniane, thotë Xheni Karaj
• Gazetari: Ekspertiza për kenianen, dëmtimet janë njësoj si kur bie nga lartësitë