Edi Paloka zbulon skenarin e protestës, ja çfarë ndodh nesër

Deputeti i Partisë Demokratike Edi Paloka tha se grumbullimi i sa më shumë njerëzve është treguesi kryesor i një proteste të suksesshme, andaj ai bëri thirrje që qytetarët të dalin më 12 nëntor.

Sipas tij numri i personave do të vërtetojë se populli di të reagojë ndaj një qeverie që siç thash dhe pak më parë i grabit, vjedh, dhunon dhe poshtëron qytetarët.

“Nëse nuk reagojmë çdo gjë në Shqipëri do vazhdojë të shkojë keq e më keq. Duhet të dalin të protestojnë dhe të mos presin t’ju shkojnë t’i prishin shtëpinë, biznesin, mos të presin që fëmijët e tyre pa shkollë dhe pa punë të marrin rrugët e emigrimit, të dalin të protestojnë që të mos dhunohen e të mos kenë frikë se do të dalin të vriten në rrugë nga krimi apo nga policia e krimit. Ka 100 arsye pse shqiptarët duhet të protestojnë,” – u shpreh Paloka.

Deputeti garantoi se protesta do të jetë e qetë dhe pa dhunë.

“Do të jetë një protestë ku ne vërtetë do ta tregojmë forcën tonë, do ta tregojmë aty me prani dhe sigurisht dhe me aktet që do të ndërmarrim,” – sqaroi Paloka.

Ai tha gjithashtu se kjo është e para nga protesta të tjera duke qenë se një qeveri nuk mund të rrëzohet vetëm me një protestë.

LEXONI GJITHASHTU:

• U përjashtua nga Kuvendi, Paloka i përgjigjet Ramës: Në parlament s’ka vlerë fjala
• Përjashtohen 10 ditë nga Kuvendi, Edi Paloka dhe Bujar Leskaj