Gjuhëtarja Ledi Shamku tha në Euronews Albania se pjesa më e madhe e emigrantëve, kryesisht afrikanë që shkojnë të jetojnë në Horë, vendbanimin arbëresh në Sicili, flasin arbërisht.
Sipas saj kjo ndodh pikërisht prej ndikimit të gjuhës në zonë dhe ruajtjes me fanatizëm nga arbëreshët.
Mënyra si është ruajtur deri më sot gjuha, lidhet me jetesën në realitete shumë të mbyllura. Shamku tregoi se arbëreshët nuk kanë bërë martesa të përziera dhe gjithashtu nuk kanë emigruar.
Me rritjen e lëvizjes, kanë filluar të mungojnë folësit aktivë, pra qytetarë që e kuptojnë arbërishten, por nuk e flasin dot. Gjuhëtarja propozoi që të ruhen zërat e të moshuarve, të cilët flasin rrjedhshëm gjuhën, në mënyrë që brezat që do vijnë të kenë shqiptime të sakta të fjalëve arbëreshe.
Shteti shqiptar duhet të bëjë të mundur që shqiptarët të njohin arbëreshët, tha Shamku.
“Nuk ka nevojë ata të na njohin ne, është e domosdoshme ne të njohim ata,” – u shpreh ajo.
Sipas gjuhëtares mënyra më e mirë është prodhimi i muzikës, filmave, kukullave apo nisma të kësaj natyre që forcojnë marrëdhëniet komunikuese me arbëreshët.
LEXONI GJITHASHTU: